മുട്ടം: മുട്ടം പോളിടെക്‌നിക്കില്‍ വിദ്യാര്‍ഥി സമരം, എസ്.എഫ്.ഐ പ്രവര്‍ത്തകര്‍ പ്രിന്‍സിപ്പലിനെ തടഞ്ഞുവെച്ചു. അറ്റകുറ്റപണികള്‍ക്കായി ആണ്‍കുട്ടികളുടെ ഹോസ്റ്റല്‍ അടച്ചിടാനുള്ള അധികൃതരുടെ നടപടിയില്‍ പ്രതിഷേധിച്ചാണ് പ്രിന്‍പ്പലിനെ തടഞ്ഞുവെച്ചത്. ഹോസ്റ്റലില്‍ വൈദ്യുതി തകരാര്‍ നിത്യസംഭവമാണ്. ഭിത്തികളിലും മറ്റും എര്‍ത്തിംഗ് ഉണ്ടായി വൈദ്യുതി പ്രഹരം ഉണ്ടാകാറുണ്ട്. ഏറെ പഴക്കമുള്ള വയറിങാണ് ഹോസ്റ്റലില്‍ ഉള്ളത്.
വൈദ്യുതി തകരാര്‍ കണ്ടെത്തുന്നതിനായി പിഡബ്ലൂഡി ഇലക്ട്രിക്കല്‍ വിഭാഗം പരിശോധന നടത്തുകയും എര്‍ത്തിങ് ഉള്ളതായി കണ്ടെത്തുകയും ചെയ്തു. ഇതു മൂലം അറ്റുകുറ്റപണികള്‍ നടത്തുന്നതിനായി വിദ്യാര്‍ഥികളോട് താല്‍കാലികമായി മാറി താമസിക്കണമെന്ന് ആവശ്യപെടു കയായിരുന്നുവെന്ന് പ്രിന്‍സിപ്പല്‍ പറഞ്ഞു. ജൂലൈ 30 ന് മുമ്പ് താമസം മാറാനാണ് ആവശ്യപ്പെട്ടിരിക്കുന്നത്. എന്നാല്‍ മൂന്ന് നിലയുള്ള ഹോസ്റ്റലിന്റെ താഴെ നിലയില്‍ അധ്യാപകര്‍ക്ക് താമസിക്കാന്‍ സൗകര്യം കൊടുത്ത് തങ്ങളെ ഒഴിവാക്കാനാണ് ശ്രമിക്കുന്നതെന്ന് ആരോപിച്ചാണ് വിദ്യാര്‍ഥികള്‍ സമരം നടത്തിയത്.
എസ്.എഫ്.ഐ നേതൃത്വത്തില്‍ പ്രിന്‍സിപ്പലിന്റെ മുറിയുടെ മുമ്പില്‍ ബെഞ്ചുകള്‍ നിരത്തി അതിനു മുകളില്‍ കിടക്കയിട്ട് ശയനമുറി തയ്യാറാക്കിയാണ് വിദ്യാര്‍ഥികള്‍ സമരം നടത്തിയത്.ഹോസ്റ്റല്‍ ഒഴിയാന്‍ 30 വരെ സമയം നല്‍കിട്ടുണ്ടെന്നും ഇപ്പോള്‍ എസ്.എഫ്.ഐ. നടത്തുന്ന സമരം അനവസരത്തിലാണെന്നും പ്രിന്‍സിപ്പല്‍ പറഞ്ഞു.
കോളജില്‍ സമരം നടക്കുന്ന വിവരം മുട്ടം പൊലിസില്‍ അറിയിച്ചെങ്കിലും സമരം കഴിഞ്ഞാണ് പൊലിസ് എത്തിയതെന്ന് പ്രിന്‍സിപ്പല്‍ പറഞ്ഞു. എന്നാല്‍ ഉച്ചകഴിഞ്ഞാണ് തങ്ങള്‍ക്കു വിവരം ലഭിച്ചതെന്ന് മുട്ടം എസ് ഐ. ബിനു. ബി.എസ്. പറയുന്നു. ഹോസ്റ്റല്‍ കെട്ടിടത്തില്‍ റീ വയറിംഗ് നടത്തണമെന്നാവശ്യപ്പെട്ട് 2016 ല്‍ പി ഡബ്ല്യു ഡിക്ക് കത്ത് നല്‍കിയിട്ടുള്ളതാണ്. പി ഡബ്ലുഡി യുടെ അനാസ്ഥയാണ് പ്രശ്‌നങ്ങള്‍ക്ക് കാരണം.
അഡ്മിഷന്‍ നടക്കുന്ന സമയമായതിനാല്‍ വിദ്യാര്‍ഥി സമരം കോളജ് അധികൃതരെ ബുദ്ധിമുട്ടിലാക്കി. തങ്ങള്‍ സമാധാനപരമായ സമരമാണ് നടത്തിയതെന്നു വിദ്യാര്‍ഥികള്‍ പറഞ്ഞു.