പോങ്യാങ്: സ്‌പെയിനിലെ തങ്ങളുടെ എംബസിയിലുണ്ടായ റെയ്ഡ് തീവ്രവാദി ആക്രമണമാണെന്ന് ഉത്തര കൊറിയ. ഫെബ്രുവരിയിലുണ്ടായ റെയ്ഡിന് ശേഷം ആദ്യമായാണ് ഉ.കൊറിയ ഔദ്യോഗികമായി പ്രതികരിക്കുന്നത്. സംഭവത്തില്‍ സ്‌പെയിന്‍ സര്‍ക്കാര്‍ അന്വേഷണം നടത്തണമെന്ന് ഉ.കൊറിയന്‍ വിദേശകാര്യ മന്ത്രാലയം പ്രസ്താവനയില്‍ പറഞ്ഞു. നയതന്ത്ര കേന്ദ്രത്തിലേക്കുള്ള അനധികൃത കടന്നുകയറ്റം രാജ്യത്തിന്റെ പരമാധികാരത്തെ ലംഘിക്കുന്നതും അന്താരാഷ്ട്ര നിയമങ്ങള്‍ക്ക് വിരുദ്ധവുമാണ്. ഇത്തരത്തിലുള്ള പ്രവൃത്തികളെ നോക്കിയിരിക്കില്ലെന്നും മന്ത്രാലയം പറഞ്ഞു. റെയ്ഡിന് പിന്നില്‍ പ്രവര്‍ത്തിച്ച തീവ്രവാദികളെ നിയമത്തിന് മുന്നില്‍ കൊണ്ടുവരണമെന്ന് മന്ത്രാലയം ആവശ്യപ്പെട്ടു.