മഞ്ചേശ്വരം: കുട്ടികളുമായി പോകുന്നതിനിടെ സ്‌കൂള്‍ ബസ് റെയില്‍വേ ട്രാക്കില്‍ കുടുങ്ങി. എഞ്ചിന്‍ തകരാറിനെ തുടര്‍ന്നാണ് ബസ് ട്രാക്കില്‍ കുടുങ്ങിയത്. നാട്ടുകാരും മറ്റുവാഹനങ്ങളിലെ ഡ്രൈവര്‍മാരും തളളിയാണ് ബസ് ട്രാക്കില്‍ നിന്നു മാറ്റിയത്. കുട്ടികളെ ഇറക്കിയശേഷമാണ് ബസ് ട്രാക്കില്‍ നിന്നു മാറ്റിയത്.
ഇന്നലെ രാവിലെ ഒന്‍പതര മണിക്ക് ഹൊസങ്കടി റെയില്‍വേ ഗേറ്റിലാണ് സംഭവം. ആനക്കല്ല് ഭാഗത്ത് നിന്ന് മഞ്ചേശ്വരത്തെ സ്വകാര്യസ്‌കൂളിലേക്ക് പോവുകയായിരുന്ന ബസാണ് ട്രാക്കില്‍ കുടുങ്ങിയത്. 60 കുട്ടികളായിരുന്നു ബസിലുണ്ടായിരുന്നത്.
തിരുവനന്തപുരം-മംഗലാപുരം മലബാര്‍ എക്‌സ്പ്രസ് കടന്നുപോയി ഗേറ്റ് തുറന്നപ്പോഴാണ് ബസ് ട്രാക്കിലേക്കെടുത്തത്. ട്രാക്കിലേക്ക് ബസ് കയറിയയുടന്‍ ബസ് നില്‍ക്കുകയായിരുന്നു. ഡ്രൈവര്‍ സ്റ്റാര്‍ട്ടാക്കാന്‍ ശ്രമിച്ചുവെങ്കിലും നടന്നില്ല. തുടര്‍ന്നാണ് ഇരുവശത്തെയും വാഹനങ്ങള്‍ നീക്കിയശേഷം ബസ് തള്ളി ട്രാക്കില്‍ നിന്നു നീക്കിയത്.