പാലക്കാട്: തത്തമംഗലം അങ്ങാടി വേലയോടനുബന്ധിച്ച് ആന, കുതിര എന്നീ ജീവികളെ മാന്യമായും നിയമങ്ങള്‍ അനുശാസിക്കുന്ന രീതിയിലും ഉപയോഗിക്കുന്നുവെന്ന് ഉറപ്പു വരുത്തണമെന്ന് ജില്ലാ കലക്ടര്‍, വനം അസി.കണ്‍സര്‍വേറ്റര്‍, ജില്ലാ പോലിസ് മേധാവി എന്നിവര്‍ക്ക് വൈല്‍ഡ് ലൈഫ് പ്രൊട്ടക്ഷന്‍ സൊസൈറ്റി ഇന്ത്യ കത്തു നല്‍കി.
രണ്ടു വര്‍ഷം കൂടുമ്പോള്‍ മാത്രം തത്തമംഗലം വേട്ടക്കറുപ്പസ്വാമി ക്ഷേത്രവുമായി ബന്ധപ്പെട്ടു നടക്കുന്ന അങ്ങാടി വേലയില്‍ ഇത്തരം ജീവികളെ ഉപയോഗിക്കുമ്പോള്‍ പലപ്പോഴും ഇവക്കും മനുഷ്യര്‍ക്കും അപകടവും ജീവനും സ്വത്തിനും നാശ നഷ്ടങ്ങള്‍ സംഭവിച്ചിട്ടുണ്ട് എന്ന വസ്തുത ഓര്‍മിപ്പിച്ചിട്ടുകൊണ്ടാണ് കത്ത്.
ഈ വര്‍ഷത്തെ ഉത്സവത്തില്‍ അത് സംഭവിക്കാതിരിക്കുവാന്‍ മുന്‍കാലങ്ങളില്‍ എടുത്തിട്ടുള്ളതിനേക്കാള്‍ കൂടുതല്‍ ഉത്തരവാദിത്തം എടുക്കണമെന്നും അതിനു കാരണമായി അതി കഠിനമായ ചൂട്, ജലാശയങ്ങളുടെ വരള്‍ച്ച, ഉത്സവങ്ങളില്‍ ജനങ്ങളുടെ പങ്കാളിത്തത്തിലുള്ള ഉയര്‍ച്ച, സ്ഥല പരിമിതി, അടിയന്തിര സാഹചര്യങ്ങള്‍ കൈകാര്യം ചെയ്യുന്നതിലെ സാങ്കേതികവും സമയാധിഷ്ഠിതമായ പോരായ്മകളും, പങ്കെടുക്കുന്ന ജീവികളുടെ ശാരീരികമാനസിക അവസ്ഥകള്‍ എന്നിവ ഈ സീസണില്‍ പ്രത്യേകം പരിഗണിക്കേണ്ടതാണ് എന്നും കത്തില്‍ പറയുന്നു.
കഴിഞ്ഞ ഉത്സവ വേളയില്‍ ആനകള്‍ അസ്വസ്ഥത സൃഷ്ടിച്ചിരുന്നതും കുതിരകള്‍ക്കും മനുഷ്യര്‍ക്കും നിരവധി അപകടങ്ങള്‍ സംഭവിച്ചിട്ടുള്ളതും ഓര്‍മിപ്പിക്കുന്നു. ഇന്നാണ് കുതിരവേല. 29 നു ആനവേലയും.
വ്രണങ്ങളും രോഗാതുരമായതും, കാഴ്ച ശേഷി ഇല്ലാത്തതും ശാരീരിക ക്ഷമത ഇല്ലാത്തതുമായ ആനകളെ കൊണ്ടുവരുന്നില്ലെന്നും ബന്ധപ്പെട്ട അസ്സല്‍ രേഖകള്‍ ഉണ്ടെന്നും പരിശീലനം സിദ്ധിച്ച നല്ല പാപ്പാന്മാര്‍ ഉണ്ടെന്നും, ആനകളെ ഉത്സവത്തിന് ഒരുദിവസമെങ്കിലും മുന്നേ കൊണ്ടുവന്ന് നല്ല ഭക്ഷണവും ഉറക്കവും വിശ്രമവും ഉറപ്പാക്കണമെന്നും ഉത്സവ ശേഷം ആറുമണിക്കൂര്‍ എങ്കിലും വിശ്രമിച്ചു മാത്രം യാത്ര തുടരുന്നുണ്ടെന്നും ഉറപ്പുവരുത്തണമെന്നും കത്തില്‍  അഭ്യര്‍ഥിക്കുന്നു.
ആന ഉത്സവ സമയത്ത് നിയമാനുസൃതമായ സ്ഥലവും കുടിവെള്ള സൗകര്യമുള്‍പ്പെടെയുള്ളവ, റാപ്പിഡ് ആക്ഷന്‍ ഫോഴ്‌സ്,  വിദഗ്ധ ഡോക്ടര്‍മാര്‍ എന്നിവരുടെ സഹായം ഉറപ്പുവരുത്തണമെന്നും അതുവഴി നാശനഷ്ടങ്ങള്‍ ഒഴിവാക്കാമെന്നും പ്രോജക്ട് ഓഫിസര്‍ എസ് ഗുരുവായൂരപ്പന്‍ പറഞ്ഞു.