കൊച്ചി: മഹരാജാസ് കോളേജിലെ എസ്.എഫ്.ഐ നേതാവ് അഭിമന്യുവിന്റെ കൊലപാതകക്കേസില്‍ ഒരാള്‍ കൂടി അറസ്റ്റില്‍. ഇന്നലെ അന്വേഷണ സംഘം കസ്റ്റഡിയിലെടുത്ത എസ്.ഡി.പി.ഐ പ്രവര്‍ത്തകന്‍ നവാസിന്റെ അറസ്റ്റാണ് പൊലിസ് രേഖപ്പെടുത്തിയത്. ഇതോടെ അറസ്റ്റിലായവരുടെ എണ്ണം അഞ്ചായി.

കൊലയാളി സംഘത്തിലുണ്ടായിരുന്നുവെന്ന് ഉറപ്പിച്ചവരുടെ വീടുകളില്‍ കഴിഞ്ഞ ദിവസങ്ങളില്‍ പൊലിസ് പരിശോധന നടത്തിയിരുന്നു. ഇതിനിടെ ദൃക്‌സാക്ഷികളെ വിളിച്ചു വരുത്തി പൊലിസ് വീണ്ടും മൊഴി രേഖപ്പെടുത്തി.

മുഖ്യ പ്രതിയായ മുഹമ്മദിനെ അന്വേഷണ സംഘത്തിന് ഇനിയും കണ്ടെത്താനായിട്ടില്ല. ഇയാള്‍ സംസ്ഥാനം വിട്ടെന്ന വിലയിരുത്തലിലാണ് പൊലിസ്. മുഹമ്മദിന്റെ വീടും അടച്ചിട്ട നിലയിലാണ്. അഭിമന്യുവിനെ കോളജിലേക്ക് വിളിച്ചു വരുത്തിയത് മുഹമ്മദാണെന്നാണ് പൊലിസിന്റെ നിഗമനം.

എറണാകുളം നെട്ടൂരില്‍ നിന്ന് കഴിഞ്ഞ ദിവസങ്ങളില്‍ ഒളിവില്‍ പോയ ആറ് പേരെ കണ്ടെത്താനുള്ള ശ്രമം പൊലിസ് ഊര്‍ജ്ജിതമാക്കി. ഈ ആറ് പേരില്‍ ആരെങ്കിലുമാണോ കൃത്യം നടത്തിയ കറുത്ത ഷര്‍ട്ടുകാരന്‍ എന്നും പൊലിസ് അന്വേഷിക്കുന്നുണ്ട്.

അതിനിടെ, 15ഓളം പേര്‍ പ്രതിപ്പട്ടികയിലുണ്ടായിട്ടും കൂടുതല്‍ പേരെ അറസ്റ്റ് ചെയ്യാന്‍ സാധിക്കാത്തതിനാല്‍ അന്വേഷണ സംഘത്തലവനെ കഴിഞ്ഞ ദിവസം മാറ്റിയിരുന്നു.