കണ്ണൂര്‍: എല്‍.ഡി.എഫ് കണ്ണൂര്‍ മണ്ഡലം സ്ഥാനാര്‍ഥി പി.കെ ശ്രീമതി ജന്മനാട്ടില്‍ പര്യടനം നടത്തി. തളിപ്പറമ്പ് മണ്ഡലത്തിലെ മയ്യില്‍, മലപ്പട്ടം, കുറ്റിയാട്ടൂര്‍ മേഖലകളിലായിരുന്നു ഇന്നലത്തെ പൊതുപര്യടനം. രാവിലെ അരിമ്പ്ര വായനശാല പരിസരത്ത് നിന്നാണ് പര്യടനം ആരംഭിച്ചത്. കോവപ്പാട് രൈരു നമ്പ്യാര്‍ സ്മാരക വായനശാല, കണ്ടക്കൈ കൃഷ്ണപ്പിള്ള വായനശാല, മയ്യില്‍ ടൗണ്‍, പതിനാറാംപറമ്പ്, അടിച്ചേരി എന്നിവിടങ്ങളിലെ സ്വീകരണത്തിന് ശേഷം കാപ്പാട്ട്കുന്നില്‍, ചെക്കിക്കാട്, മാണിയൂര്‍ കാവുംചാലില്‍ സമാപിച്ചു. നേതാക്കളായ ടി.കെ ഗോവിന്ദന്‍, ബിജു കണ്ടക്കൈ, പി. മുകുന്ദന്‍, പി.കെ ശ്യാമള, കെ.സി സോമന്‍ നമ്പ്യാര്‍, വേലിക്കാത്ത് രാഘവന്‍, കെ.വി ഗോപിനാഥ്, ഇ.പി.ആര്‍ വേശാല, കെ. സാജന്‍ എന്നിവര്‍ സ്ഥാനാര്‍ഥിക്കൊപ്പമുണ്ടായി. സി.പി.എം പോളിറ്റ്ബ്യൂറോ അംഗം എസ്. രാമചന്ദ്രന്‍ പിള്ള ഇന്നു മണ്ഡലത്തിലെ വിവിധ പരിപാടികളില്‍ പങ്കെടുക്കും. രാവിലെ 9.30ന് തേര്‍ത്തല്ലി, 4.30ന് തളിപ്പറമ്പ് ടൗണ്‍ സ്‌ക്വയര്‍, 5.30ന് വന്‍കുളത്ത് വയല്‍ എന്നിവിടങ്ങളിലെ തെരഞ്ഞെടുപ്പ് പൊതുയോഗങ്ങള്‍ എസ്.രാമചന്ദ്രന്‍ പിള്ള ഉദ്ഘാടനം ചെയ്യും.