കുമളി: കഞ്ചാവ് കടത്തുന്നതിനിടെ മൂന്നു യുവാക്കള്‍ കുമളിയില്‍ പിടിയില്‍. തിരൂര്‍ ചെറിയമുണ്ടം തലക്കടത്തൂര്‍ സ്വദേശികളായ പങ്ങത്ത് വീട്ടില്‍ സിറാജുദ്ദീന്‍ (30), പേരൂളില്‍ വീട്ടില്‍ ജുനൈദ് (23), താന്നൂര്‍ മീനടത്തൂരില്‍ മൂത്തേടത്ത്കാട്ടില്‍ സുമേഷ് (22) എന്നിവരെയാണ് അറസ്റ്റ് ചെയ്തത്.
ഇന്നലെ രാവിലെ ഏഴോടെ കുമളി അതിര്‍ത്തിയിലെ എക്‌സൈസ് ചെക്‌പോസ്റ്റിലായിരുന്നു സംഭവം. ഇവര്‍ സഞ്ചരിച്ച ഇന്നോവ കാര്‍ ധൃതിയില്‍ വിട്ടുപോകാന്‍ ശ്രമിക്കുന്നതിനിടെ വിദഗ്ധമായാണ് ഉദ്യോഗസ്ഥര്‍ വാഹനം പിടികൂടിയത്. പരിശോധനയില്‍ വാഹനത്തിനുള്ളില്‍ പ്ലാസ്റ്റിക് കവറിനുള്ളിലായി ഒളിപ്പിച്ചുവച്ചിരുന്ന കഞ്ചാവ് ഉദ്യോഗസ്ഥര്‍ കണ്ടെടുക്കുകയായിരുന്നു.
തമിഴ്‌നാട്ടില്‍ നിന്നും സ്വന്തം ഉപയോഗത്തിനായി പതിനായിരം രൂപയ്ക്കാണ് കഞ്ചാവ് വാങ്ങിയതെന്ന് ഇവര്‍ മൊഴിനല്‍കി. കുമളി എക്‌സൈസ് ഇന്‍സ്‌പെക്ടര്‍ അല്‍ഫോന്‍സ് ജേക്കബ്ബ്, പ്രിവന്റീവ് ഓഫിസര്‍മാരായ സി .പി കൃഷ്ണകുമാര്‍, വി .രവി, സിവില്‍ എക്‌സൈസ് ഓഫിസര്‍മാരായ സുരേഷ് കെ.എം, അനൂപ് സോമന്‍, ബൈജു .ബി, അന്‍സാര്‍ ഒ.വൈ എന്നിവര്‍ ചേര്‍ന്നാണ് പ്രതികളെ പിടികൂടിയത്.