ഭോപ്പാല്‍: ശമ്പളക്കൂടുതല്‍ അവശ്യപ്പെട്ട ദലിത് യുവാവിന് കിട്ടിയത് ചാട്ടയടി. മധ്യപ്രദേശിലെ ഹൊശാംഗ്ബാദിലാണ് സംഭവം. പെട്രോള്‍ പമ്പ് ജീവനക്കാരനായ ദലിത് യുവാവിനാണ് മാനേജരുടെ വക നൂറു ചാട്ടയടി കിട്ടിയത്. പെട്രോള്‍ പമ്പിലെ മെഷീനില്‍ കെട്ടിയിട്ടായിരുന്നു മര്‍ദനം.3000 രൂപയായിരുന്ന ശമ്പളം 5000 ആക്കി വര്‍ധിപ്പിക്കണം എന്നായിരുന്നു ജീവനക്കാരനായ അജയ് അഹര്‍വാറിന്റെ ആവശ്യം. ആവശ്യം പരിഗണിക്കാന്‍ മാനേജര്‍ ദീപക്ക് സാഹുവും അസിസ്റ്റന്റ് മാനേജര്‍ ആകാശ് സാഹുവും തയാറായില്ല. തുടര്‍ന്ന് ജൂണ്‍ 22 ന് ഇയാള്‍ ജോലിക്കു വരാതിരുന്നു. എന്നാല്‍ മാനേജര്‍ ദീപക്ക് ആളെ വിട്ട് യുവാവിനെ പെട്രോള്‍ പമ്പില്‍ വിളിച്ചു വരുത്തി. തുടര്‍ന്നു പമ്പില്‍ കെട്ടിയിട്ടു ചാട്ടവാറു കൊണ്ട് തല്ലിച്ചതക്കുകയായിരുന്നു. ഇവരെ പൊലിസ് അറസ്റ്റു ചെയ്തു.