മുസഫര്‍പൂര്‍ കോടതിയില്‍ ഹരജി

ജയ്പൂര്‍: കൊവിഡ് മാറ്റുമെന്നവകാശപ്പെട്ട് ബാബാ രാംദേവിന്റെ പതഞ്ജലി പുറത്തിറക്കിയ മരുന്നിനെച്ചൊല്ലി വിവാദം തുടരുന്നു. ഈ മരുന്നിന്റെ ക്ലിനിക്കല്‍ ട്രയല്‍ നടന്നെന്നു പറയപ്പെടുന്ന ജയ്പൂരിലെ നാഷനല്‍ ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സസിനോട് രാജസ്ഥാന്‍ സര്‍ക്കാര്‍ വിശദീകരണം തേടി.

ബുധനാഴ്ചതന്നെ ഈ നോട്ടിസ് നല്‍കിയിരുന്നുവെന്നാണ് വിവരം. കൊറോണില്‍ എന്ന പേരിലുള്ള ഈ ആയുര്‍വേദ മരുന്നിന്റെ ക്ലിനിക്കല്‍ ട്രയല്‍ നടത്തുന്നതായി ആശുപത്രി അധികൃതര്‍ സര്‍ക്കാരിനെ അറിയിച്ചിരുന്നില്ല. നേരത്തെ, കേന്ദ്ര ആയുര്‍വേദ മന്ത്രാലയം സംഭവത്തില്‍ പതഞ്ജലി കമ്പനിയോട് വിശദീകരണം തേടിയിരുന്നു. ഇതിനു പിന്നാലെ രാജസ്ഥാനിലെ നാഷനല്‍ ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സസില്‍ ക്ലിനിക്കല്‍ ട്രയല്‍ നടത്തിയെന്നു കമ്പനി അവകാശപ്പെട്ടു. ഇതോടെയാണ് സംസ്ഥാന സര്‍ക്കാര്‍ ഇക്കാര്യം അറിഞ്ഞിട്ടില്ലെന്നും സര്‍ക്കാര്‍ അനുമതിയില്ലാതെ മരുന്ന് വിറ്റാല്‍ നടപടിയെടുക്കുമെന്നും വ്യക്തമാക്കി രാജസ്ഥാന്‍ സര്‍ക്കാര്‍ രംഗത്തെത്തിയിരുന്നത്. 

സംഭവവുമായി ബന്ധപ്പെട്ട് ബിഹാറിലെ മുസഫര്‍പൂര്‍ കോടതിയില്‍ ഹരജിയും സമര്‍പ്പിക്കപ്പെട്ടിട്ടുണ്ട്. ഇത് ഈ മാസം 30ന് പരിഗണിക്കും.മഹാരാഷ്ട്ര സര്‍ക്കാരും സംസ്ഥാനത്ത് ഈ മരുന്നിന്റെ വില്‍പന നിരോധിച്ചിരുന്നു.