നീലേശ്വരം: പുഴ നികത്തുന്ന വിവരം അറിഞ്ഞെത്തിയ പൊലിസ് നികത്തിയ ഭാഗത്തിന് അരികു കെട്ടാന്‍ കൊണ്ടുവന്ന ചെങ്കല്ല് ലോഡ് പിടിച്ചു. വിവരം അറിഞ്ഞു നീലേശ്വരം പൊലിസ് സ്റ്റേഷനില്‍ എത്തിയ സി.പി.എം, സി.ഐ.ടി.യു നേതാക്കള്‍ ഉള്‍പ്പെട്ട സംഘം തുച്ഛമായ തുക ഫൈന്‍ അടച്ചു ചെങ്കല്ല് മോചിപ്പിച്ചു കൊണ്ടുപോയി. നിടുങ്കണ്ട ഇറക്കത്തിലെ കക്ക കമ്പനിക്കു കിഴക്കുവശത്തെ സ്ഥലം നികത്തുന്ന വിവരം അറിഞ്ഞാണു നീലേശ്വരം പൊലിസ് എത്തിയത്.
മണല്‍ ഇറക്കുന്നുവെന്ന വിവരം അറിഞ്ഞെത്തിയ പൊലിസ് ചെങ്കല്ല് ഇറക്കുന്ന ലോറിയാണു കണ്ടത്. ലോറി കസ്റ്റഡിയില്‍ എടുത്ത വിവരം അറിഞ്ഞതോടെ നീലേശ്വരം നഗരസഭാ മുന്‍ കൗണ്‍സലര്‍ കെ.വി അമ്പാടിയുടെ നേതൃത്വത്തിലുള്ള സംഘം പൊലിസ് സ്റ്റേഷനില്‍ എത്തി. ഇവര്‍ പൊലിസുമായി വാക്കേറ്റത്തില്‍ ഏര്‍പ്പെട്ടു. പിടിവാശിക്കൊടുവില്‍ സംഘം തുച്ഛമായ തുക അടച്ചു ലോറി മോചിപ്പിക്കുകയായിരുന്നു. നീലേശ്വരം പുഴ സമീപത്തെ സ്വകാര്യ വ്യക്തി മണ്ണിട്ടു നികത്തുന്ന വിവരം പരിസ്ഥിതി പ്രവര്‍ത്തകരും ശ്രദ്ധിച്ചിട്ടില്ല. യുവജനസംഘടനകളും മൗനത്തിലാണ്. നീലേശ്വരം പുഴയുടെ വിവിധ ഭാഗങ്ങളിലെ കൈയേറ്റത്തില്‍ റവന്യൂ വകുപ്പ് ഇടപെടണമെന്ന ആവശ്യവും ശക്തമാണ്.