മാള: നടവരമ്പ്-കരിങ്ങോള്‍ച്ചിറ-മാള ഹൈവെ നിര്‍മാണത്തിന് നടപടി. സെന്‍ട്രല്‍ റോഡ് ഫണ്ടില്‍ നിന്ന് 12 കോടി രൂപയാണ് നിര്‍മാണത്തിനായി അനുവദിച്ചിട്ടുള്ളത്. എന്‍.എച്ച് സെക്ഷനാണ് നിര്‍മണ ചുമതല. കരിങ്ങോള്‍ച്ചിറ വഴിയാണ് റോഡ് കടന്ന് പോകുന്നത്. നിലവില്‍ കരിങ്ങോള്‍ചിറ പാലത്തിന്റെ നിര്‍മാണം പൂര്‍ത്തീകരിച്ച് ആറു മാസത്തിലേറെയായിട്ടും റോഡ് പണി പൂര്‍ത്തീകരിക്കാന്‍ കഴിയാത്ത സാഹചര്യമാണുള്ളത്. പാലം നിര്‍മാണത്തിനൊപ്പം റോഡ് പണിക്കും ഫണ്ട് അനുവദിച്ചിരുന്നു.  റോഡിനായി ഏറ്റെടുക്കേണ്ട കരിങ്ങോള്‍ച്ചിറ മസ്ജിദ് ഭൂമിക്ക് നഷ്ടപരിഹാരം നല്‍കി ഭൂമി അക്വയര്‍ ചെയ്യാത്തതിനാലാണ് റോഡ് പണി പൂര്‍ത്തീകരിക്കാന്‍ കഴിയാതെ വന്നത്. പാലം അപ്രോച്ച് റോഡ് നിര്‍മാണം ഉടന്‍ പൂര്‍ത്തീകരിക്കണമെന്ന് ആവശ്യപ്പെട്ട് ജനകീയ കൂട്ടായ്മ പാലത്തിനു മുകളില്‍ 30 ദിവസത്തോളം നീണ്ട നിരാഹാര സമരം നടത്തിയിരുന്നു. ഒടുവില്‍ തൃശൂര്‍ ജില്ലാ കലക്ടര്‍ ഡോ. എ കൗശികന്‍ ഐ.എ.എസ് ഇടപെട്ട് നിര്‍മാണം പൂര്‍ത്തീകരിക്കാന്‍ വേണ്ട നടപടികള്‍ സ്വീകരിക്കാമെന്ന ഉറപ്പിന്മേല്‍ സമരം പിന്‍വലിച്ചു. എന്നാല്‍ ആ ഉറപ്പും പാഴായി.  ഇപ്പോള്‍ റോഡിന്റെ അലൈന്‍മെന്റില്‍ മാറ്റം വരുത്തി മസ്ജിദ് ഭൂമി നഷ്ടപ്പെടാത്ത നിലയില്‍ റോഡ് നിര്‍മാണം നടത്താനുള്ള ശ്രമം പുതിയ പൊതുമരാമത്ത് വകുപ്പ് എ.ഇ ആരംഭിച്ചിട്ടുണ്ട്.  സൂപ്രണ്ടിങ് എന്‍ജിനീയര്‍ ഉള്‍പ്പെടെയുള്ള ഉന്നത ഉദ്യോഗസ്ഥരോട് കൂടിയാലോചിച്ച് കരിങ്ങോള്‍ച്ചിറ റോഡ് നിര്‍മാണ പ്രശ്‌നം പരിഹരിക്കാന്‍ ശ്രമിക്കുമെന്നും എ.ഇ പറഞ്ഞു. അതേസമയം വഖ്ഫ് ഭൂമി നഷ്ടപ്പെടാതെ റോഡ് നിര്‍മാണം പൂര്‍ത്തീകരിക്കുകയാണെങ്കില്‍ പൊതുമരാമത്ത് വകുപ്പ് അധികൃതര്‍ക്കെതിരേ കരിങ്ങോള്‍ച്ചിറ വഖ്ഫ് സംരക്ഷണ സമിതി വഖഫ് ട്രൈബൂണല്‍ കോടതിയില്‍ നല്‍കിയ കേസ് പിന്‍വലിക്കുമെന്ന് സമിതി കണ്‍വീനര്‍ അബ്ദുല്‍ കരീം പറഞ്ഞു.
ഇതോടെ വര്‍ഷങ്ങളായി തകര്‍ന്ന് കിടക്കുന്ന കരിങ്ങോള്‍ച്ചിറ റോഡിന്റെ ശോച്യാവസ്ഥക്ക് പരിഹാരമുണ്ടാകുമെന്ന പ്രതീക്ഷയിലാണ് നാട്ടുകാര്‍.