സംസ്ഥാനത്തെ എല്ലാ വിദ്യാലയങ്ങളിലും മലയാളം നിര്‍ബന്ധമാക്കി ഈയിടെ സര്‍ക്കാര്‍ ഓര്‍ഡിനന്‍സിറക്കുകയുണ്ടായി. മലയാളം അറിയാത്ത ഒരു കുട്ടിക്ക് സ്‌കൂള്‍ പഠനം കഴിഞ്ഞു സര്‍ക്കാര്‍ ജോലിക്ക് ചേരാവുന്ന അവസ്ഥയായിരുന്നു ഇവിടെ. മുലപ്പാലിനോടൊപ്പം നാം നുണയുന്ന മാതൃഭാഷ നമ്മുടെ കുഞ്ഞുങ്ങളില്‍നിന്ന് കവര്‍ന്നെടുത്തതിനുത്തരവാദികള്‍ നാം മുതിര്‍ന്നവര്‍ തന്നെയാണ്.

മലയാളഭാഷയെ സര്‍ക്കാര്‍ തലത്തില്‍ ഓര്‍ഡിനന്‍സ് പുറത്തിറക്കി രക്ഷിച്ചെടുക്കേണ്ടതല്ല. ശ്രേഷ്ഠഭാഷയായി മാറിയത്‌കൊണ്ടും വലിയ കാര്യമില്ല. ഇപ്പോഴത്തെ സര്‍ക്കാര്‍ ഓര്‍ഡിനന്‍സ് നല്ല കാര്യം തന്നെ. അതേ സമയം ഭാഷയെ സംബന്ധിച്ച് മലയാളിയുടെ സമീപനമാണ് മാറേണ്ടത്.
ബംഗാളിയോ, തമിഴനോ സ്വന്തം മാതൃഭാഷയോട് കാണിക്കുന്ന സമീപനമല്ല മലയാളികളുടേത്. ബംഗാളിക്ക് രബീന്ദ്ര സംഗീതവും ബംഗാളിയും അവരുടെ പാരമ്പര്യത്തിന്റെ ഭാഗമാണ്. രബീന്ദ്ര സംഗീതം അറിയുന്ന പെണ്‍കുട്ടികള്‍ക്ക് വിവാഹ മാര്‍ക്കറ്റില്‍ മൂല്യം കൂടുതലാണ്. തമിഴരുടെ സ്ഥിതിയും മലയാളികളുടേതില്‍നിന്ന് വ്യത്യസ്തമാണ്. ഭാഷ തമിഴരുടെ ഉയിരും മണ്ണുമാണ്. (ഉടല്‍ മണ്ണുക്ക് ഉയിര്‍ തമിഴുക്ക്) എന്നാണ് ആപ്തവാക്യം. ഏറ്റവും ഇഷ്ടപ്പെട്ട നേതാവിനെ 'ചെമ്മൊഴിയേ', 'തായ്തമിഴേ' എന്നവര്‍ സംബോധന ചെയ്യും. 'മലയാളിമ' എന്ന് ഇഷ്ടത്തോടെ നാം ആരെയും വിളിക്കാറില്ല. തമിഴന്റെ ഭാഷ, സംസ്‌കാരം, പാരമ്പര്യം ഇതൊക്കെ ഇല്ലാതായിപ്പോകുന്നു എന്ന് തോന്നിയാല്‍ പിന്നീട് തമിഴന്‍ പ്രക്ഷോഭത്തിനിറങ്ങും. മലയാളി ഇങ്ങനെയല്ല. മക്കളെ ഇംഗ്ലീഷ് മീഡിയത്തിലയച്ചുകൊണ്ട് അവന്‍ മലയാള ഭാഷയുടെ മാധുര്യത്തെക്കുറിച്ച് സംസാരിക്കും. വീട്ടിലും ഓഫിസിലും ഔദ്യോഗിക കാര്യങ്ങളിലും ഇംഗ്ലീഷ് ഉപയോഗിക്കുന്നവര്‍ തന്നെ മലയാളത്തിന്റെ മാഹാത്മ്യത്തെക്കുറിച്ച് പ്രസംഗിക്കും.
''ജനിക്കും നിമിഷം തൊട്ടെന്‍
മകനിംഗ്ലീഷ് പഠിക്കണം
അതിനാല്‍ ഭാര്യതന്‍ പേറിങ്ങിംഗ്ലണ്ടില്‍
തന്നെയാക്കി ഞാന്‍.'' എന്ന് കുഞ്ഞുണ്ണിമാഷ് പറഞ്ഞത് ശരാശരി മലയാളിയുടെ മനോഭാവത്തെപ്പറ്റിയാണ്.
ലോകത്തെ ആദ്യത്തെ മുപ്പത് ഭാഷകളില്‍ മൂന്നിലൊന്നും ഇന്ത്യന്‍ ഭാഷകളാണ്. അതില്‍തന്നെ ഏറ്റവും കൂടുതല്‍ ജനങ്ങള്‍ ഉപയോഗിക്കുന്ന സംസ്ഥാന ഔദ്യോഗിക ഭാഷയാണ് മലയാളം. ഗ്രീക്ക് ഉള്‍പ്പെടെ പല യൂറോപ്യന്‍ ഭാഷകളേക്കാളും ആളുകള്‍ മാതൃഭാഷയായി ഉപയോഗിക്കുന്ന ലോക ഭാഷകളില്‍ 26 ാം സ്ഥാനത്ത് നില്‍ക്കുന്ന മലയാളം ജാതി-മതഭേദമില്ലാതെ കേരളത്തിലെ 97 ശതമാനത്തിന്റെയും മാതൃഭാഷയാണ്.
പല ഭാഷകളില്‍നിന്നും വാക്കുകള്‍ സ്വീകരിച്ചാണ് ഭാഷ വളരുന്നത്. 'സ്വിച്ച്' എന്നതിന് വിദ്യുച്ഛക്തി ഗമനാഗമനയന്ത്രം എന്നു പറയുന്നതിനുപകരം സ്വിച്ച് എന്നുതന്നെ മലയാളത്തിലും ഉപയോഗിക്കുന്നതാണ് നല്ലത്. ഭാഷയിലും മൗലികവാദം നന്നല്ല. മാതൃഭാഷയോടുള്ള സ്‌നേഹം അന്യഭാഷകളോടുള്ള വിദ്വേഷമായി വളരരുത്.
ഭാഷ ഇന്ന് മാറിക്കൊണ്ടിരിക്കുന്നുണ്ട്. എസ്.എം.എസ് ഭാഷയെക്കുറിച്ച് ലോകമെങ്ങും പഠനങ്ങള്‍ നടക്കുന്നുണ്ട്. ലോക പ്രശസ്ത ഭാഷാ ശാസ്ത്രജ്ഞനായ ഡേവിഡ് ക്രിസ്റ്റലിന്റെ 'ടെക്സ്റ്റിങ് ദി ഗ്രേറ്റ് ഡിബേറ്റ്' എന്ന പുസ്തകത്തില്‍ ഇംഗ്ലീഷിതര ഭാഷകളെക്കുറിച്ചുള്ള അധ്യായത്തില്‍ പരമാര്‍ശിക്കുന്ന ഏക ഇന്ത്യന്‍ ഭാഷ മലയാളമാണ്. മലയാളത്തിന്റെ അക്ഷര ബാഹുല്യവും വാചകങ്ങളുടെ നീളക്കൂടുതലുമൊക്കെ ക്രിസ്റ്റല്‍ ചൂണ്ടിക്കാട്ടുന്നു.
മലയാള ഭാഷയെ വികൃതമാക്കുന്നതില്‍ നമ്മുടെ ചാനലുകള്‍ വഹിക്കുന്ന പങ്കിനെക്കുറിച്ചും പറയേണ്ടിയിരിക്കുന്നു. ഇംഗ്ലീഷും മലയാളവും കൂടിക്കലര്‍ന്ന രണ്ടുമല്ലാത്ത ഒരു ഓക്കാനം വരുത്തുന്ന ഭാഷ ചാനലുകള്‍ നമ്മുടെ സ്വീകരണ മുറിയിലേക്ക് വലിച്ചെറിയുന്നു.