ഉദുമ: ഉദുമ ഗ്രാമ പഞ്ചായത്ത് ഭരണ സമിതി, കുടുംബശ്രീ സി.ഡി.എസ്, മാങ്ങാട് പാടശേഖര സമിതി എന്നിവയുടെ സംയുക്ത നേതൃത്വത്തില്‍ മാങ്ങാട് വയലില്‍ നടന്ന 'മഴപ്പൊലിമ' നാടിന്റെ ഉത്സവമായി. ഞാറ് നടുന്നതോടൊപ്പം നാട്ടിപ്പാട്ട്, ഞാറ് നടീല്‍ , സ്ത്രീകള്‍ക്കും പുരുഷന്മാര്‍ക്കും കമ്പവലി, ചാക്ക് റൈസ്, സ്പൂണ്‍ റൈസ്, നൂറ് മീറ്റര്‍ ഓട്ടം, കുട്ടികളുടെ ഫുട്‌ബോള്‍ എന്നീ മത്സരങ്ങളും നടന്നു. ഉദുമയിലെ ദീല്‍ ദയാല്‍ ഉപാധ്യായ കോളജ് വിദ്യാര്‍ഥികളും മഴപ്പൊലിമയില്‍ പങ്കെടുത്തു.
കാര്‍ഷിക സംസ്‌കൃതിയുടെ ഓര്‍മ്മകള്‍ പങ്കുവെക്കുക, കാര്‍ഷിക സംസ്‌കൃതി വീണ്ടെടുക്കുക, മണ്ണും ജലവും ജൈവ വൈവിധ്യവും സംരക്ഷിക്കുക, തരിശുഭൂമി കൃഷിയോഗ്യമാക്കുക എന്നീ ലക്ഷ്യത്തോടെയാണ് ചേറാണ് ചോറ് എന്ന പേരില്‍ മഴപ്പൊലിമ സംഘടിപ്പിച്ചത്. മാങ്ങാട് വില്ലേജ് ഓഫിസ് പരിസരത്തുനിന്ന് ജനങ്ങള്‍ ജാഥയായി വന്നാണ് പാടത്തിറങ്ങിയത്.
'മഴപ്പൊലിമ' കാഞ്ഞങ്ങാട് ബ്ലോക്ക് പഞ്ചായത്ത് പ്രസിഡന്റ് എം. ഗൗരി ഉദ്ഘാടനം ചെയ്തു. ഉദുമ പഞ്ചായത്ത് പ്രസിഡന്റ് കെ.എ മുഹമ്മദലി അധ്യക്ഷനായി. കുടുംബശ്രീ ജില്ലാ കോ ഓഡിനേറ്റര്‍ ടി.ടി സുരേന്ദ്രന്‍ 'മഴപ്പൊലിമ' വിശദീകരിച്ചു. സംഘാടക സമിതി ചെയര്‍മാന്‍ ബീബി അഷറഫ്, ലക്ഷ്മി ബാലന്‍, സ്ഥിരം സമിതി ചെയര്‍മാന്മാരായ കെ. പ്രഭാകരന്‍, കെ. സന്തോഷ് കുമാര്‍, സൈനബ അബൂബക്കര്‍, അംഗങ്ങളായ ഹമീദ് മാങ്ങാട്, ചന്ദ്രന്‍ നാലാം വാതുക്കല്‍, കമലാക്ഷി, വത്സലാ ശ്രീധരന്‍, കൃഷി ഓഫിസര്‍ എം.സി സത്മ, മാങ്ങാട് പാടശേഖര സമിതി പ്രസിഡന്റ് പി.എ ഹസൈനാര്‍, കുടുംബശ്രീ സി.ഡി.എസ് ചെയര്‍പേഴ്‌സന്‍ എം. പുഷ്പലത എന്നിവര്‍ സംസാരിച്ചു. പഴയ കാല കര്‍ഷകരെ ചടങ്ങില്‍ ആദരിച്ചു.
ചെറുവത്തൂര്‍: കയ്യൂര്‍-ചീമേനി, ചെറുവത്തൂര്‍ പഞ്ചായത്തുകളില്‍ നടന്ന 'മഴപ്പൊലിമ'യില്‍ സ്ത്രീകളും കുട്ടികളും ഉള്‍പ്പെടെ നൂറുകണക്കിനാളുകള്‍ വയലുകളിലിറങ്ങി. ചെറുവത്തൂര്‍ പഞ്ചായത്ത് സി.ഡി.എസിന്റെ നേതൃത്വത്തില്‍ പുതിയകണ്ടം പാടശേഖരത്തിലും കയ്യൂര്‍-ചീമേനി പഞ്ചായത്ത് സി.ഡി.എസിന്റെ നേതൃത്വത്തില്‍ കൂക്കോട്ട് വയലിലും സംഘടിപ്പിച്ച 'മഴപ്പൊലിമ' കൃഷിപാഠത്തിന്റെ നേര്‍ കാഴ്ചയായി. കയ്യൂര്‍-ചീമേനി പഞ്ചായത്തില്‍ എം. രാജഗോപാലന്‍ എം.എല്‍.എ ഉദ്ഘാടനം ചെയ്തു.
പഞ്ചായത്ത് പ്രസിഡന്റ് കെ. ശകുന്തള അധ്യക്ഷയായി. കെ.വി ഗംഗാധര വാര്യര്‍, കയനി കുഞ്ഞിക്കണ്ണന്‍, കെ.പി രജനി, അജുദേവ്, ഹരിദാസ് സംസാരിച്ചു. ചെറുവത്തൂരില്‍ പഞ്ചായത്ത് പ്രസിഡന്റ് പ്രസിഡന്റ് മാധവന്‍ മണിയറ ഉദ്ഘാടനം ചെയ്തു. മാധവി കൃഷ്ണന്‍ അധ്യക്ഷയായി. ടി.ടി സുരേന്ദ്രന്‍, സി.വി പ്രമീള, കെ.വി കുഞ്ഞിരാമന്‍, കെ. നാരായണന്‍, പി. വിജയന്‍, എം.വി ജയശ്രീ, വീണാറാണി, കെ. രാഗേഷ്, വി.വി റീന, പി.വി നിര്‍മല സംസാരിച്ചു.