കോഴിക്കോട്: തെരഞ്ഞെടുപ്പില്‍ സി.പി.എം ആശയ ദാരിദ്ര്യം നേരിടുന്നതു കൊണ്ടാണ് രാഹുല്‍ ഗാന്ധിയെ വിമര്‍ശിക്കുന്നതെന്ന് പ്രതിപക്ഷനേതാവ് രമേശ് ചെന്നിത്തല . പത്രിക സമര്‍പ്പണത്തിന് രാഹുല്‍ വയനാട്ടിലെത്തുന്നതിനു മുന്നോടിയായുള്ള ഒരുക്കങ്ങള്‍ വിലയിരുത്താന്‍ വിളിച്ചു ചേര്‍ത്ത യു.ഡി.എഫ് നേതൃയോഗത്തിനു ശേഷം സംസാരിക്കുകയായിരുന്നു അദ്ദേഹം.
രാഹുലിന്റെ സന്ദര്‍ശനം സംബന്ധിച്ച ഒരുക്കങ്ങള്‍ പൂര്‍ത്തിയായതായും അദ്ദേഹം അറിയിച്ചു. ഇടതുമുന്നണിയുടെ രാഹുല്‍ ഗാന്ധിയോടുള്ള വിമര്‍ശനം ദൗര്‍ഭാഗ്യകരമാണ്. രാഹുലിന്റെ വരവോടെ കേരളത്തില്‍ 20 സീറ്റും കോണ്‍ഗ്രസ് നേടുമെന്നും അദ്ദേഹം പറഞ്ഞു.
യോഗത്തില്‍ എ.ഐ.സി.സി ജനറല്‍ സെക്രട്ടറിമാരായ ഉമ്മന്‍ ചാണ്ടി, കെ.സി വേണുഗോപാല്‍, മുകുള്‍ വാസ്‌നിക്, കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന്‍, മുസ്‌ലിം ലീഗ് നേതാക്കളായ പി.കെ കുഞ്ഞാലിക്കുട്ടി, കെ.പി.എ മജീദ്, ഡി.സി.സി പ്രസിഡന്റുമാരായ ഐ.സി. ബാലകൃഷ്ണന്‍, അഡ്വ. ടി. സിദ്ധിഖ് തുടങ്ങിയവരും പങ്കെടുത്തു.