താമരശ്ശേരി: ഗള്‍ഫ് നാടുകളിലെ ചൂട് മാത്രമല്ല, അവിടെ മാത്രം കണ്ടുവരുന്ന കുലച്ച ഈന്തപ്പനയും താമരശ്ശേരിയിലുണ്ട്. സിറ്റിമാളിനു മുന്നിലാണ് ഏവരെയും ആകര്‍ഷിപ്പിക്കുന്ന കാഴ്ചയൊരുക്കി ഈന്തപ്പന കുലച്ചത്. ഗള്‍ഫ് നാടുകളില്‍ ഈന്തപ്പന കായ്ക്കുന്ന മാര്‍ച്ച് മാസത്തിലെ കൊടുംചൂട് കേരളത്തിലും അനുഭവപ്പെട്ടതാവാം ഈന്തപ്പന കുലക്കാന്‍ കാരണമെന്നാണ് കരുതുന്നത്.
പ്രവാസി വ്യവസായി ഡോ. വി.ഒ.ടി അബ്ദുറഹ്മാന്റെ ഉടമസ്ഥതയിലുള്ള സിറ്റിമാളില്‍ അലങ്കരമായാണ് രണ്ട് ഈന്തപ്പന തൈകള്‍ ഏഴ്മാസം മുന്‍പ് നട്ടത്. വലിയ പ്രതീക്ഷയൊന്നുമില്ലാതെയാണ് ഇവിടെ ഒരു ആണ്‍മരവും ഒരു പെണ്‍മരവും നട്ടത്. മാളിലെ ജീവനക്കാര്‍ മുന്തിയ പരിചരണമാണ് ഈ മരങ്ങള്‍ക്ക് നല്‍കിയത്. ഇതോടെ ഇവ രണ്ടും നന്നായി വളര്‍ന്നു. ഉടമസ്ഥന്റെയും ജീവനക്കാരുടെയും കണക്കു കൂട്ടലുകള്‍ തെറ്റിച്ചു ഏഴുമാസമായപ്പോഴേക്കും ഈന്തപ്പന കുലച്ചത് ഏവരെയും അത്ഭുതപ്പെടുത്തിയിരിക്കുകയാണ്. താമരശ്ശേരിയിലെ താരമായിമാറിയ ഈന്തപ്പനകളെയും കാരക്കയും കാണാന്‍ മാളിലെത്തുന്നവരുടെ എണ്ണം ഇപ്പോള്‍ വര്‍ധിച്ചിട്ടുണ്ട്.