മാള: മെറ്റ്‌സ് എന്‍ജിനീയറിങ് കോളേജിനെതിരെ നടക്കുന്ന സമരം അവസാനിപ്പിക്കാന്‍ ജില്ലാ കലക്ടറുടെ നേതൃത്വത്തില്‍ ചര്‍ച്ചക്ക് സാധ്യത തെളിയുന്നു. സമരവുമായി ബന്ധപ്പെട്ട വിഷയത്തില്‍ സാങ്കേതിക സര്‍വ്വകലാശാല ഇടപെടുമെന്നും സൂചനയുണ്ട്. സമരത്തെ തുടര്‍ന്ന് കോളേജ് അടച്ചിട്ടിരിക്കുകയാണ്. വിദ്യാര്‍ഥികളുടെ ഭാവി കണക്കിലെടുത്ത് ജില്ലാ കലക്ടറും സര്‍വ്വകലാശാല അധികൃതരും ഇടപെടണമെന്ന ആവശ്യം ശക്തമായിരുന്നു. അടുത്ത ആഴ്ച ആദ്യം ജില്ലാ കലക്ടര്‍ ചര്‍ച്ച നടത്തുമെന്നാണ് എസ്.എഫ്.ഐ നേതാക്കള്‍ നല്‍കുന്ന സൂചന. പ്രിന്‍സിപ്പലിനെ പുറത്താക്കണമെന്ന ആവശ്യത്തില്‍ എസ്.എഫ്.ഐ ഉറച്ചുനില്‍ക്കുകയാണ്. അതേസമയം കോളേജ് അധികൃതര്‍ ഈ ആവശ്യത്തോട് ഇതുവരെ അനുകൂല നിലപാട് എടുത്തിട്ടില്ല.