തിരുവനന്തപുരം: വാഹന അപകടത്തില്‍പ്പെടുന്നവര്‍ക്ക് സൗജന്യ ചികിത്സ നല്‍കാനുള്ള പദ്ധതി ഉടന്‍. ഏറ്റവും ഗുരുതരമായ സമയത്ത് തന്നെ ഇരകള്‍ക്ക് ചികിത്സ നല്‍കാന്‍ ലക്ഷ്യമിട്ടുള്ള പദ്ധതി ഉടന്‍ യാഥാര്‍ഥ്യമാകും. ഈ മാസം പത്തിന് മുന്‍പ് സംസ്ഥാനങ്ങളിലെയും കേന്ദ്രഭരണ പ്രദേശങ്ങളിലെയും ഗതാഗതത്തിന്റെ ചുമതലയുള്ള പ്രിന്‍സിപ്പല്‍ സെക്രട്ടറിമാര്‍ കേന്ദ്ര സര്‍ക്കാരിന് റിപ്പോര്‍ട്ട് സമര്‍പ്പിക്കും. മോട്ടോര്‍ വാഹന അപകട നിധിയടക്കമുള്ള വിപുലമായ പദ്ധതിയുടെ നടത്തിപ്പ് ചുമതല 21,000 ലധികം ആശുപത്രികളുമായി രാജ്യത്താകമാനം വേരുകളുള്ള ദേശീയ ആരോഗ്യ അതോറിറ്റിക്കാണ്.
അപകടത്തില്‍പ്പെടുന്നവരുടെ ചികില്‍സയ്ക്കും പരുക്കേല്‍ക്കുന്നവര്‍ക്കുള്ള നഷ്ടപരിഹാരത്തിനും അപകടത്തില്‍ മരിച്ചവരുടെ കുടുംബത്തിനുള്ള നഷ്ടപരിഹാരത്തിനും അപകടനിധി ഉപയോഗിക്കും.
പണമടയ്ക്കാനുള്ള ശേഷി നോക്കാതെ തന്നെ അപകടത്തില്‍പ്പെട്ടവര്‍ക്ക് കൃത്യസമയത്ത് മെച്ചപ്പെട്ട ചികില്‍സ നല്‍കാനാകുന്ന തരത്തിലാണ് പദ്ധതി വിഭാവനം ചെയ്തിട്ടുള്ളത്.
റോഡ് ഉപയോഗിക്കുന്ന എല്ലാവരെയും ഇന്‍ഷുറന്‍സ് പരിരക്ഷയില്‍ കൊണ്ടു വരാനും പദ്ധതിയില്‍ ആലോചനയുണ്ട്.