ന്യൂഡല്‍ഹി: ബി.ജെ.പി സര്‍ക്കാരിനെ ലിഞ്ച് പൂജാരിയെന്ന് പരിഹസിച്ച് കോണ്‍ഗ്രസ.് കോണ്‍ഗ്രസിനെ ബെയ്ല്‍ ഗാഡി' (ജാമ്യക്കാരുടെ വണ്ടി) എന്ന് പ്രധാനമന്ത്രി നരേന്ദ്ര മോദി പരിഹസിച്ചതിന് മറുപടിയായാണ് കോണ്‍ഗ്രസ് പ്രതികരണം.
മുതിര്‍ന്ന കോണ്‍ഗ്രസ് നേതാവ് കപില്‍ സിബലാണ് ട്വിറ്ററിലൂടെ ബി.ജെ.പിയെ പരിഹസിച്ചത്. ജാര്‍ഖണ്ഡിലെ ആള്‍ക്കൂട്ട കൊലപാതക കേസിലെ പ്രതികള്‍ക്ക് സ്വീകരണം നല്‍കിയ ചടങ്ങില്‍ കേന്ദമന്ത്രി ജയന്ത് സിന്‍ഹ പങ്കെടുത്തിരുന്നു. ഇതിന്റെ അടിസ്ഥാനത്തിലാണ് കപില്‍ സിബല്‍ ബി.ജെ.പി സര്‍ക്കാരിനെ ലിഞ്ച് പൂജാരി എന്ന് പരിഹസിച്ചത്. രാംഗഢ് ആള്‍ക്കൂട്ട കൊലപാതക കേസില്‍ പ്രതികളായ എട്ടുപേര്‍ക്ക് കഴിഞ്ഞദിവസം ഹൈക്കോടതി ജാമ്യം നല്‍കിയിരുന്നു. ജാമ്യത്തില്‍ ഇറങ്ങിയ പ്രതികള്‍ക്ക് പ്രാദേശിക ബി.ജെ.പി നേതൃത്വം സംഘടിപ്പിച്ച സ്വീകരണ ചടങ്ങില്‍ പങ്കെടുത്ത ജയന്ത് സിന്‍ഹ പ്രതികളെ ഹാരമണിയിക്കുകയും മധുരം വിതരണം നടത്തുകയും ചെയ്തിരുന്നു. ജയന്തിന്റെ ഈ നടപടിക്കെതിരെ പിതാവും മുന്‍ ബി.ജെ.പി നേതാവുമായ യശ്വന്ത് സിന്‍ഹ രംഗത്തെത്തിയിരുന്നു.