ഗുരുവായൂര്‍: പൊലിസ് കസ്റ്റഡിയില്‍ നിന്നും രക്ഷപ്പെട്ട പ്രതിയെ അറസ്റ്റ് ചെയ്തു. ചാവക്കാട് തിരുവത്ര ബേബി റോഡില്‍ കൊപ്പര ഫസലു(40)വിനെയാണ് ഗുരുവായൂര്‍ ടെമ്പിള്‍ സി.ഐ സി. പ്രേമാനന്ദകൃഷ്ണന്റെ നേതൃത്വത്തില്‍ അറസ്റ്റ് ചെയ്തത്.
ഫെബ്രുവരി 11ന് ചാവക്കാട് മുതുവട്ടൂര്‍ ചെറ്റിയാലക്കല്‍ കുംഭഭരണി മഹോത്സവത്തിനിടെ പൂരപറമ്പില്‍ നിന്നും ചാലക്കുടി പൊലിസ് ഗുരുവായൂര്‍ ടെമ്പിള്‍ പൊലിസിന്റെ സഹായത്തോടെ ചാലക്കുടിയിലെ ഒരു കേസുമായി ബന്ധപ്പെട്ട് ഫസലുവിനെ കസ്റ്റഡിയിലെടുത്തെങ്കിലും ഒരു സംഘം ബലം പ്രയോഗിച്ച് ഫസലുവിനെ മോചിപ്പിച്ച് രക്ഷപ്പെടുത്തുകയായിരുന്നു. സംഭവ ശേഷം ഒളിവിലായിരുന്ന പ്രതിയെ പരപ്പനങ്ങാടി റെയില്‍വേ സ്റ്റേഷനടുത്തുള്ള ലോഡ്ജില്‍ നിന്നാണ് ഇയാളെ പൊലിസ് പിടികൂടിയത്.
കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു. കൊലപാതകം, കൊലപാതക ശ്രമം, പിടിച്ചുപറി തുടങ്ങി വിവിധ സ്റ്റേഷനുകളിലായി ഇയാള്‍ക്കെതിരേ 20ലധികം കേസുകളുണ്ടെന്ന് പൊലിസ് പറഞ്ഞു.  ഫസലുവിനെ രക്ഷപ്പെടാന്‍ സഹായിച്ച കേസില്‍ 25ഓളം പേര്‍ക്കെതിരേ കേസെടുത്തിട്ടുണ്ട്. രണ്ടുപേരെ നേരത്തെ അറസ്റ്റ് ചെയ്തിരുന്നു.