ദ്വാരക: എടവക ഗ്രാമപഞ്ചായത്തിലെ തോണിച്ചാല്‍ അത്തേരിക്കുന്നില്‍ പ്രവര്‍ത്തിക്കുന്ന സ്വകാര്യ  ക്രഷര്‍ അടച്ച് പൂട്ടാന്‍ ട്രൈബ്യൂണല്‍ ഉത്തരവ്. ഇതോടെ പ്രദേശവാസികള്‍ ജനകീയ സമരസമിതി രൂപീകരിച്ച് 276 ദിവസമായി നടത്തിവന്ന സമരം നിര്‍ത്തിയതായി സമരസമിതി അറിയിച്ചു.
ജനകീയ  സമരങ്ങളുടെ ഫലമായി എടവക ഗ്രാമ പഞ്ചായത്ത് ക്രഷര്‍ പ്രവര്‍ത്തിക്കുന്നതിനുള്ള ലൈസന്‍സ് പുതുക്കി നല്‍കിയിരുന്നില്ല. ഇതേ തുടര്‍ന്ന് ക്രഷര്‍ ഉടമ പഞ്ചായത്ത് ട്രൈബ്യൂണലിനെ  സമീപിക്കുകയും  പരാതി നല്‍കുകയും  ചെയ്തിരുന്നു.
പരാതി സ്വീകരിച്ച ട്രൈബ്യൂണല്‍ പഞ്ചായത്ത് നടപടിക്ക് സ്റ്റേ നല്‍കുകയും ഇതിന്റെ പിന്‍ബലത്തില്‍ ക്രഷര്‍ പ്രവര്‍ത്തിപ്പിക്കുകയുമായിരുന്നു. ക്രഷര്‍ പ്രവര്‍ത്തിക്കുമ്പോഴും സമര സമിതി സമരവുമായി  മുന്നോട്ട് പോയി.
ഇതേ തുടര്‍ന്ന് ഉടമ ക്രഷറിലേക്ക്  മെറ്റല്‍ കൊണ്ടു പോകുന്നതിന് ഹൈക്കോടതിയില്‍ പരാതി നല്‍കി പൊലിസ് സംരക്ഷണം നേടിയിരുന്നു. കേസ് നല്‍കിയും പൊലിസിനെ ഉപയോഗിച്ചും  സമരം പരാജയപ്പെടുത്താനും പലതവണ ശ്രമങ്ങളുണ്ടായിരുന്നു. വിവിധ സമയങ്ങളിലായി സമരസമിതി പ്രവര്‍ത്തകര്‍ക്കെതിരെ പത്തോളം കേസുകള്‍ നിലവിലുണ്ട്. ആദിവാസികളും സ്ത്രീകളും ജനപ്രതിനിധികളുമടക്കം നിരവധി തവണ അറസ്റ്റ് വരിക്കുകയും ചെയ്തിരുന്നു.
ട്രൈബ്യൂണലില്‍ നല്‍കിയ പരാതിയില്‍ വാദം പൂര്‍ത്തീകരിച്ച് ലൈസന്‍സ് നല്‍കാതിരുന്ന നടപടി അഗീകരിക്കുകയും ക്രഷര്‍ ഉടമയുടെ പരാതി തള്ളുകയുമായിരുന്നു.
പരാതി തള്ളിയ സാഹചര്യത്തില്‍ ക്രഷര്‍ പ്രവര്‍ത്തനം അവസാനിപ്പിച്ച് അടച്ച് പൂട്ടേണ്ടി വരും.
ക്രഷറില്‍ ആധുനിക മെഷിനുകള്‍ ഉപയോഗിച്ച് പരിസരവാസികള്‍ക്കും പരിസ്ഥിതിക്കും ദോഷം വരുത്തുകയും ശബ്ദ മലിനീകരണം സൃഷ്ടിക്കുകയും ചെയ്തതോടെയാണ് പ്രദേശവാസികള്‍ സമരവുമായി രംഗത്തെത്തിയത്.
 17 ആദിവാസി കുടുംബങ്ങളും മറ്റു കുടംബങ്ങളും വര്‍ഷങ്ങളായി  ക്രഷര്‍ മുഖേനയുള്ള ദുരിതം അനുഭവിച്ച് ജീവിക്കുകയായിരുന്നു.