തളിപ്പറമ്പ്: കുപ്പത്ത് വീട്ടിനു മുകളിലേക്ക് മണ്ണിടിഞ്ഞു വീണു. ഇന്നലെ പുലര്‍ച്ചെ ആറോടെയാണ് കുപ്പം പടവില്‍ തച്ചന്‍ വീട്ടില്‍ രുഗ്മിണിയുടെ വീടിന് പിറകു ഭാഗത്തെ കിടപ്പുമുറിയിലേക്ക് മണ്ണിടിഞ്ഞ് വീണത്.
ഈ മുറിയില്‍ കട്ടിലില്‍ കിടക്കുകയായിരുന്ന രുഗ്മിണിയുടെ ഹൃദ്രോഗിയായ മകള്‍ പരുക്കേല്‍ക്കാതെ രക്ഷപ്പെട്ടു. വീടിന് പിറകുവശത്തെ കുന്ന് സ്വകാര്യ വ്യക്തി ജെ.സി.ബി ഉപയോഗിച്ച് ഇടിച്ചുനിരത്തി ക്വാര്‍ട്ടേഴ്‌സ് നിര്‍മിക്കാനുള്ള തയാറെടുപ്പിലായിരുന്നു.
മണ്ണെടുക്കുമ്പോള്‍ തന്നെ തങ്ങളുടെ വീടിന് അപകടം വരുന്ന രീതിയില്‍ മണ്ണെടുക്കരുതെന്ന് ആവശ്യപ്പെട്ടിരുന്നു. മണ്ണെടുത്ത ഭാഗത്ത് കഴിഞ്ഞ ദിവസം കോണ്‍ക്രീറ്റ് പില്ലര്‍ നിര്‍മിച്ചിരുന്നെങ്കിലും ഇന്നലെ രാത്രി പെയ്ത കനത്ത മഴയില്‍ കല്ലും കോണ്‍ക്രീറ്റുമുള്‍പ്പെടെ ഇടിഞ്ഞ് വീടിന് മുകളിലേക്ക് പതിക്കുകയായിരുന്നു.
പരിയാരം വില്ലേജ് അസിസ്റ്റന്റ് കെ.പി മനോജ്, പഞ്ചായത്തംഗം പി. ഇബ്രാഹിം എന്നിവര്‍ സ്ഥലത്തെത്തി. 60,000 രൂപയുടെ നഷ്ടം കണക്കാക്കുന്നു. വീടിന് അപകടം വരുത്തുന്ന വിധത്തില്‍ മണ്ണെടുത്തവര്‍ക്കെതിരേ പഞ്ചായത്ത്, റവന്യൂ അധികൃതര്‍ നോട്ടിസ് നല്‍കും.