കണ്ണൂര്‍: റോയല്‍ എന്‍ഫീല്‍ഡ് ഷോറൂമില്‍നിന്ന് ഒരുവര്‍ഷം മുന്‍പ് മോഷണം പോയ ബൈക്കും പ്രതിയും പിടിയില്‍. പുതിയ ബൈക്ക് മോഷ്ടിച്ച് കര്‍ണാടകയിലേക്ക് കടത്തിയ സംഭവത്തില്‍ ബി.ടെക് വിദ്യാര്‍ഥി തൗഷിഖ് കിഷോര്‍(23) ആണ് പിടിയിലായത്. കഴിഞ്ഞ വര്‍ഷം കണ്ണൂരിലെ പ്രമുഖ ബൈക്ക് ഷോറൂമിന്റെ യാര്‍ഡില്‍ നിന്നാണ് രജിസ്‌ട്രേഷന്‍ ആകാത്ത പുതിയ ബൈക്ക് മോഷണം പോയത്. പൊലിസ് അന്വേഷണം നടത്തിയെങ്കിലും തുമ്പൊന്നും ലഭിച്ചിരുന്നില്ല. ഇതിനിടെ കര്‍ണാടകയിലെ ബണ്ട്വാളില്‍ നിന്നും പൊലിസ് പരിശോധനയ്ക്കിടെ ലഭിച്ച ബൈക്കിനെ കുറിച്ച് സംശയം ഉണ്ടായതോടെ വിവരം കേരള പൊലിസിന് കൈമാറി. തുടര്‍ന്ന് നടത്തിയ അന്വേഷണത്തില്‍ കണ്ണോത്തുംചാലിലെ മറ്റൊരു വണ്ടിയുടെ നമ്പറാണെന്നു കണ്ടെത്തി. പിടിയിലായ വണ്ടിയുടെ എന്‍ജിന്‍ നമ്പര്‍ പരിശോധിച്ചതോടെ നേരത്തെ കാണാതായ പുതിയ വണ്ടിയുടെതാണെന്ന് ബോധ്യമായി. തുടര്‍ന്ന് നടത്തിയ അന്വേഷണത്തിലാണ് കിഷോറാണ് സംഭവത്തിന് പിന്നിലെന്നും ഇയാള്‍ ഷോറൂമിന് സമീപം താമസിക്കുന്നയാളാണെന്നും കണ്ടെത്തിയത്. ഇയാള്‍ മോഷണ സമയത്ത് മംഗളൂരുവില്‍ പഠിക്കുകയായിരുന്നെന്നും പൊലിസിന് മൊഴിനല്‍കി. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.