മലപ്പുറം: ലൈറ്റ് ഓഫ് മദീന പദ്ധതിയുടെ തുടര്‍പ്രവര്‍ത്തനങ്ങള്‍ നടത്തുകയും മഹല്ലുതലങ്ങളില്‍ പദ്ധതി പ്രവര്‍ത്തനങ്ങള്‍ ശക്തിപ്പെടുത്തുകയും ചെയ്യുകയെന്ന ലക്ഷ്യത്തോടെ ജില്ലയിലെ 19 മേഖലകളിലും സുന്നി മഹല്ല്് ഫെഡറേഷന്‍ ജില്ലാ കമ്മിറ്റി നടത്തുന്ന കണ്‍വന്‍ഷനുകള്‍ നാളെ തുടങ്ങും. മേഖലാതല പരിപാടികള്‍ക്കു ശേഷം പഞ്ചായത്തുതലങ്ങളിലും കണ്‍വന്‍ഷനുകള്‍ നടക്കും.
എസ്.എം.എഫ് നടപ്പിലാക്കുന്ന സാമൂഹിക പദ്ധതികള്‍ക്കൊപ്പം സ്വദേശി ദര്‍സ് പോലുള്ള പദ്ധതികളും നടപ്പിലാക്കുന്നതിലൂടെ മഹല്ലിന്റെ സാമൂഹിക, സാംസ്‌കാരിക മേഖലകളില്‍ വലിയ മാറ്റങ്ങള്‍ കൊണ്ടുവരാനും വൈജ്ഞാനിക രംഗത്തു വിപ്ലവകരമായ മുന്നേറ്റം നടത്താനും സാധിക്കുമെന്നു ജില്ലാ ഓര്‍ഗനൈസര്‍മാരുടെ യോഗം വിലയിരുത്തി.
മഹല്ലിലെ പാവപ്പെട്ട ജനങ്ങളെ മാത്രം ലക്ഷ്യംവച്ചു നടപ്പാക്കുന്ന സാമ്പത്തിക പദ്ധതികള്‍ നടപ്പാക്കാന്‍ മുന്നോട്ടുവരുന്ന മഹല്ല് കമ്മിറ്റികള്‍ക്കാവശ്യമായ പ്രോത്സാഹനവും നല്‍കും.
നാളെ മലപ്പുറം, എടക്കര മേഖലകള്‍ , 11നു വേങ്ങര, കാളികാവ്, 13നു കൊണ്ടോട്ടി, താനൂര്‍, 14നു കുറ്റിപ്പുറം, നിലമ്പൂര്‍, 15ന് എടവണ്ണപ്പാറ, 16നു മഞ്ചേരി, 17നു തിരൂര്‍, 18ന് അരീക്കോട്, 21നു വളവന്നൂര്‍, 22നു കോട്ടക്കല്‍, 24നു പൊന്നാനി, 25നു പെരിന്തല്‍മണ്ണ, മേലാറ്റൂര്‍, 27നു ചേളാരി, 28നു തിരൂരങ്ങാടി എന്നിങ്ങനെയാണ് മേഖലാ കണ്‍വന്‍ഷനുകള്‍ നടക്കുക.