ഹരിപ്പാട്: പതിവായി മദ്യപിച്ചെത്തി ഭാര്യയെ മര്‍ദിക്കുന്ന വയോധികനെ ഭാര്യാ സഹോദരന്‍ വെട്ടിക്കൊന്നു. ഭാര്യാ സഹോദരനെ പൊലിസ് അറസ്റ്റു ചെയ്തു. കുമാരപുരം എരിക്കാവ് മൂന്നുകുളങ്ങര വീട്ടില്‍ ശ്രീകുമാരപിള്ള (65) യാണ് മരിച്ചത്. സംഭവത്തില്‍ ഈ വീട്ടില്‍ തന്നെ താമസിച്ചു വരുന്ന ഭാര്യാ സഹോദരനായ കൃഷ്ണന്‍ നായരെ (63) പൊലിസ് അറസ്റ്റു ചെയ്തു. 

വെള്ളിയാഴ്ച രാത്രി പത്തരയോടെയാണ് സംഭവം. സ്ഥിരമായി മദ്യപിച്ചു എത്തുന്ന ശ്രീകുമാരപിള്ള ഭാര്യ ലളിതയുമായി വഴക്കിടുന്നത് പതിവായിരുന്നു. ലളിത കാന്‍സര്‍ രോഗിയാണ്. വെള്ളിയാഴ്ച രാത്രി ശ്രീകുമാരപിള്ള മദ്യപിച്ചു വന്ന് വഴക്കുണ്ടാക്കുന്നതിനിടയില്‍ ഭാര്യയുടെ കഴുത്തിന് കുത്തിപ്പിടിച്ചു. അവര്‍ ശ്വാസം കിട്ടാതെ പിടഞ്ഞപ്പോള്‍ കൃഷ്ണന്‍നായര്‍ ഇടപെട്ട് തടയുകയും ഇവര്‍ തമ്മില്‍ തര്‍ക്കം ഉണ്ടാവുകയും ചെയ്തു. 

വാക്കുതര്‍ക്കത്തിനിടയില്‍ കൃഷ്ണന്‍നായര്‍ വെട്ടുകത്തി ഉപയോഗിച്ച് ശ്രീകുമാരപിള്ളയുടെ തോളിലും വലതുകാലിലെ തുടയിലും വെട്ടുകയായിരുന്നു. ഉടന്‍ ഹരിപ്പാട് താലൂക്ക് ആശുപത്രിയില്‍ എത്തിച്ചെങ്കിലും രക്ഷിക്കാനായില്ല. ഇന്നലെ രാവിലെ എട്ടോടെ പൊലിസെത്തി കൃഷ്ണന്‍ നായരെ അറസ്റ്റു ചെയ്തു. കായംകുളത്തെ കൊവിഡ് നിരീക്ഷണ കേന്ദ്രത്തിലാക്കി. ഡിവൈ.എസ്.പി അലക്‌സ് ബേബിയുടെ നിര്‍ദേശപ്രകാരം തൃക്കുന്നപ്പുഴ സി.ഐ ആര്‍.ജോസ്, എസ്.ഐ ആനന്ദ ബാബു, ജൂനിയര്‍ എസ്.ഐ ജയപ്രകാശ്, ഗ്രേഡ് എസ്.ഐ സുനില്‍ കുമാര്‍, എ.എസ്.ഐ പ്രദീപ്, സി.പി.ഒ ബാബു എന്നിവര്‍ അടങ്ങിയ സംഘമാണ് പ്രതിയെ അറസ്റ്റ് ചെയ്തത്. മരിച്ച ശ്രീകുമാരപിള്ള കരാര്‍ ജോലികള്‍ ഏറ്റെടുത്ത് നടത്തുന്ന വ്യക്തിയായിരുന്നു. മക്കള്‍: അഞ്ജലി, അഞ്ജന. മരുമക്കള്‍: കണ്ണന്‍,ശ്രീജിത്ത്.