റിയാദ്: സ്വദേശിവല്‍ക്കരണം ലംഘിച്ചു മൊബൈല്‍ ഷോപ്പില്‍ ജോലി ചെയ്ത എട്ടു വിദേശ തൊഴിലാളികളെ റിയാദില്‍ പൊലിസ് അറസ്റ്റ് ചെയ്തു. തൊഴില്‍ മന്ത്രാലയം നടത്തിയ റെയ്ഡില്‍ പിടികൂടിയ ഇവരെ തുടര്‍നടപടികള്‍ക്കായി പാസ്സ്‌പോര്‍ട്ട് വകുപ്പിന് കീഴിലുളള ഡിപോര്‍ട്ടേഷന്‍ സെന്ററിലേക്കു മാറ്റിയതായി തൊഴില്‍ വകുപ്പ് അറിയിച്ചു. റിയാദ് ബിന്‍ ഖാസിം ഹരാജിലെ മൊബൈല്‍ ഷോപ്പില്‍ ജോലി ചെയ്യുന്ന വിദേശ തൊഴിലാളികളുടെ വീഡിയോ ദൃശ്യങ്ങള്‍ സാമൂഹിക മാധ്യമങ്ങളില്‍ പ്രചരിച്ചിരുന്നു.

ഇത് ശ്രദ്ധയില്‍ പെട്ട തൊഴില്‍ മന്ത്രാലയം റിയാദ് ലേബര്‍ ഓഫിസ് മേധാവിയോട് അന്വേഷണം നടത്താന്‍ ഉത്തരവിട്ടിരുന്നു. തുടര്‍ന്ന് ലേബര്‍ ഓഫിസിലെ ഫീല്‍ഡ് സൂപ്പര്‍വൈസര്‍ സ്വാലിഹ് അല്‍മുതൈരിയുടെ നേതൃത്വത്തില്‍ പൊലിസുമായി സഹകരിച്ചു നടത്തിയ പരിശോധനയിലാണ് രണ്ട് വിദേശികള്‍ പിടിയിലായത്. ഈ പ്രദേശത്തുളള മുഴുവന്‍ മൊബൈല്‍ ഫോണ്‍ ഷോപ്പുകളിലും കഴിഞ്ഞ ദിവസം അധികൃതര്‍ പരിശോധന നടത്തി. ഇതോടെയാണ് മറ്റു സ്ഥാപനങ്ങളില്‍ നിന്നും ആറ് വിദേശികളെയും കസ്റ്റഡിയിലെടുത്തത്. പിടിയിലായ വിദേശികളും ഇവര്‍ക്ക് ജോലി നല്‍കിയ സ്ഥാപന ഉടമകളും നിയമ നടപടി നേരിടേണ്ടി വരും. തൊഴില്‍ നിയമ ലംഘകരെ പിടികൂടുന്നതിന് ശക്തമായ റെയ്ഡുകള്‍ തുടരുമെന്നും നിയമ ലംഘകര്‍ക്കെതിരെ നിയമാനുസൃത നടപടികള്‍ സ്വീകരിക്കുമെന്നും റിയാദ് ലേബര്‍ ഓഫിസ് വ്യക്തമാക്കി.