തിരുവനന്തപുരം:  കുടിവെള്ളം മുട്ടിയപ്പോള്‍ നെയ്യാറിനെ ഓര്‍ത്ത അധികൃതര്‍ നാളിതുവരെ നെയ്യാറിനെ സംരക്ഷിക്കുന്നതിനുള്ള ഒരു നടപടിയുമെടുത്തിട്ടില്ല.  നെയ്യാറിന്റെ പലഭാഗങ്ങളും  മാലിന്യം നിറഞ്ഞു ദുര്‍ഗന്ധപൂരിതമായ സ്ഥിതിയിലാണ്.  അധികൃതരുടെ നിഷേധാത്മക നിലപാടില്‍ പ്രതിഷേധിച്ച് നിയമ നടപടിക്കൊരുങ്ങി നെയ്യാര്‍ സംരക്ഷണസമിതി ഇപ്പോള്‍ രംഗത്തുണ്ട്.
 ഓടകള്‍ വഴി നദിയിലേക്ക് തുറന്നുവിടുന്ന വിസര്‍ജ്യങ്ങളും മാലിന്യങ്ങളുമാണ് നദിയെ മലിനപ്പെടുത്തുന്നത്. നെയ്യാര്‍ ആരംഭിക്കുന്ന നെയ്യാര്‍ഡാമിലെ നാച്ചിമുടി പിന്നിടുന്ന കാട്ടാക്കട മുതല്‍ അവസാനിക്കുന്ന പൂവാര്‍ തീരം വരെയുള്ള ഭാഗത്താണു മാലിന്യനിക്ഷേപം.  കാട്ടാക്കട മുതല്‍ പൂവാര്‍ വരെയുള്ള തീരത്തും പരിസരപ്രദേശങ്ങളിലുമായി ഒരു ഡസനിലധികം ജലസംഭരണികളും സ്ഥിതി ചെയ്യുന്നുണ്ട്.
 നെയ്യാറില്‍ നിന്നും പമ്പ് ചെയ്ത് ശുദ്ധീകരിച്ച് ഈ സംഭരണികളില്‍ ശേഖരിക്കുന്ന ജലമാണ് പ്രദേശത്തെ വിവിധയിടങ്ങളില്‍ കുടിവെള്ളത്തിനായി വിതരണം ചെയ്യുന്നത്. ഇതിനു പുറമേ നിത്യേന ആയിരക്കണക്കിന് പേര്‍  കുളിക്കുന്നതിനും വസ്ത്രമലക്കുന്നതിനുമായി നദിയെ ആശ്രയിക്കുന്നുണ്ട്. എന്നിട്ടും നെയ്യാറിലെ മാലിന്യ നിക്ഷേപത്തോട്  അധികൃതര്‍ മുഖംതിരിക്കുകയാണ് ചെയ്തത്.  ഇനിയെങ്കിലും നെയ്യാറിനെ സംരക്ഷിക്കാന്‍ അധികൃതര്‍  അടിയന്തര നടപടി സ്വീകരിക്കണമെന്ന് സംരക്ഷണസമിതി ആവശ്യപ്പെട്ടു.