കാഞ്ഞങ്ങാട്: സമസ്ത കേരള ജംഇയ്യത്തുല്‍ മുഅല്ലിമീന്‍ സംസ്ഥാന തല ഇസ്‌ലാമിക് കലാമേളയുടെ സ്വാഗത സംഘം ഓഫിസ് ഉദ്ഘാടനം നാളെ ചട്ടഞ്ചാലിലെ മലബാര്‍ ഇസ്‌ലാമിക് കോംപ്ലക്‌സില്‍ വച്ച് നടക്കും.
അടുത്ത മാസം 12 മുതല്‍ 14 വരെ നടക്കുന്ന കലാമേളയില്‍ കേരളം, കര്‍ണാടക, ലക്ഷദ്വീപ് ഉള്‍പ്പെടെയുള്ള പ്രദേശങ്ങളില്‍ നിന്ന് തിരഞ്ഞെടുക്കപ്പെട്ട 2500 ഓളം കലാപ്രതിഭകള്‍ പങ്കെടുക്കും. അറുപതോളം ഇനങ്ങളിലായുള്ള മത്സര ഇനങ്ങള്‍ മൂന്നു ദിവസങ്ങളിലായി എട്ടു വേദികളിലായാണ് നടക്കുക.
ഏഷ്യയിലെ തന്നെ ഏറ്റവും വലിയ ഇസ്‌ലാമിക് കലാമേളയ്ക്ക് വേണ്ടിയുള്ള ഒരുക്കങ്ങള്‍ മലബാര്‍ ഇസ്‌ലാമിക് കോംപ്ലക്‌സില്‍ നടന്നു വരികയാണ്. നാളെ രാവിലെ 11 ന് നടക്കുന്ന ചടങ്ങില്‍ സ്വാഗത സംഘം ഭാരവാഹികളും പ്രമുഖ നേതാക്കളും സംബന്ധിക്കും.