കാസര്‍കോട്: ലോക്‌സഭാ തെരഞ്ഞെടുപ്പിന് ഉപയോഗപ്പെടുത്തുന്ന സ്വകാര്യ വാഹനങ്ങളിലെ ഡ്രൈവര്‍മാര്‍ക്ക് തെരഞ്ഞെടുപ്പ് ദിവസം അവരവരുടെ ബൂത്തില്‍ എത്തി വോട്ട് ചെയ്യാന്‍ സാധിക്കില്ലെങ്കില്‍ അവര്‍ക്ക് വോട്ടു ചെയ്യുന്നതിനുള്ള അവസരം തെരഞ്ഞെടുപ്പ് കമ്മിഷന്‍ ഒരുക്കി. പോസ്റ്റല്‍ ബാലറ്റ് അല്ലെങ്കില്‍ ഇലക്ഷന്‍ ഡ്യൂട്ടി സര്‍ട്ടിഫിക്കറ്റ് മുഖേന വോട്ട് ചെയ്യാം.
തെരെഞ്ഞടുപ്പുമായി ബന്ധപ്പെട്ട് ഏറ്റെടുത്തിട്ടുള്ള സ്വകാര്യ വാഹനങ്ങളിലെ ഡ്രൈവര്‍മാരുടെ ലിസ്റ്റ് ട്രാന്‍സ്‌പോര്‍ട്ട് നോഡല്‍ ഓഫിസര്‍ ജില്ലാ വരണാധികാരിക്ക് നല്‍കിയിട്ടുണ്ട്. ഈ ഡ്രൈവര്‍മാര്‍ക്ക് പോസ്റ്റല്‍ ബാലറ്റ്, ഇലക്ഷന്‍ ഡ്യൂട്ടി സര്‍ട്ടിഫിക്കറ്റ് നല്‍കാന്‍ ജില്ലാ വരണാധികാരികൂടിയായ കലക്ടര്‍ ഡോ. ഡി. സജിത് ബാബു നിര്‍ദേശം നല്‍കി. ഇങ്ങനെ വോട്ട് ചെയ്യാന്‍ താല്‍പര്യപ്പെടുന്ന ഡ്രൈവര്‍മാര്‍ കലക്ടറേറ്റില്‍ പ്രവര്‍ത്തിക്കുന്ന ഇലക്ഷന്‍ വിഭാഗവുമായി 15നകം ബന്ധപ്പെട്ട് ഉത്തരവിന്റെ കോപ്പി കൈപ്പറ്റി അപേക്ഷ നല്‍കണം. ഇതിനുള്ള ക്രമീകരണങ്ങള്‍ കലക്ടറേറ്റില്‍ ഒരുക്കിയിട്ടുണ്ട്.
പോസ്റ്റല്‍ബാലറ്റ്, ഇലക്ഷന്‍ ഡ്യൂട്ടി സര്‍ട്ടിഫിക്കറ്റ് എന്നിവയ്ക്ക് അപേക്ഷിക്കുന്നവര്‍ അവര്‍ക്ക് വോട്ടുള്ള നിയോജകമണ്ഡലത്തിന്റെ പേരും ബൂത്തു നമ്പരും വോട്ടര്‍പ്പട്ടികയിലെ അവരുടെ ക്രമനമ്പരും കൃത്യമായി രേഖപ്പെടുത്തണം.