തിരുവനന്തപുരം: വ്യവസായ മേഖലയായ പാലക്കാട്ടെ കഞ്ചിക്കോട്ട് അന്തരീക്ഷ മലിനീകരണം വ്യാപകമാകുന്നുവെന്ന ആക്ഷേപം പരിശോധിക്കുമെന്നു വ്യവസായ മന്ത്രി ഇ.പി ജയരാജന്‍. മലിനീകരണ നിയന്ത്രണ ബോര്‍ഡ് പരാതികള്‍ പരിശോധിക്കുകയും നിരീക്ഷിക്കുകയും ചെയ്തുവരുന്നതായി വി.എസ് അച്യുതാനന്ദന്റെ സബ്മിഷന് മറുപടിയായി മന്ത്രി അറിയിച്ചു.
സോപ്പ് മുതല്‍ ഡിസ്റ്റിലറി വരെ നാനൂറോളം വ്യവസായ സ്ഥാപനങ്ങളാണ് കഞ്ചിക്കോടുള്ളത്. മലിനീകരണം ഉണ്ടാകുന്നുവെന്നു പ്രധാനമായും ആരോപണമുയരുന്നത് ഇരുമ്പുരുക്ക് വ്യവസായങ്ങളെ സംബന്ധിച്ചാണ്.
35 ഇരുമ്പുരുക്ക് വ്യവസായസ്ഥാപനങ്ങള്‍ ഉള്ളതില്‍ 20 എണ്ണം മാത്രമേ നിലവില്‍ പ്രവര്‍ത്തിക്കുന്നുള്ളൂ. മാനദണ്ഡങ്ങള്‍ അനുസരിച്ചാണിവ പ്രവര്‍ത്തിക്കുന്നത്. മലിനീകരണം നിയന്ത്രിക്കുന്നതിനുള്ള നടപടികള്‍ക്കൊപ്പം തന്നെ തൊഴിലാളികളുടെ ആരോഗ്യം സംരക്ഷിക്കാനുള്ള നടപടികളും സ്വീകരിക്കുമെന്നും മന്ത്രി അറിയിച്ചു.