തിരുവനന്തപുരം: സംസ്ഥാനത്തെ വിധവകളുടെ സംരക്ഷണത്തിനു ബില്‍ കൊണ്ടുവരുന്ന കാര്യം പരിഗണിക്കുമെന്ന്  മന്ത്രി കെ.കെ ശൈലജ. നിയമസഭയില്‍ പ്രതിഭാ ഹരി അനൗദ്യോഗിക ബില്ലിന് അവതരണാനുമതി തേടിയപ്പോള്‍ മറുപടി പറയുകയായിരുന്നു മന്ത്രി.
വിധവകളുടെ സംരക്ഷണത്തിന് നിലവിലുള്ള വ്യവസ്ഥകള്‍ കാര്യക്ഷമമായി നടപ്പാക്കും. സംസ്ഥാനത്തെ വിധവകളുടെ കണക്കെടുക്കാന്‍ പഞ്ചായത്തുതലത്തില്‍ സംവിധാനമുണ്ടാക്കും. വിധവകളുടെ നിലവിലുള്ള നിര്‍വചനത്തില്‍ മാറ്റംവരുത്തുന്നത് പരിശോധിക്കും. വിധവകളുടെ സംരക്ഷണത്തിനു ബില്‍ കൊണ്ടുവരുന്നതിനു മുന്‍പുതന്നെ അവര്‍ക്കായി ക്ഷേമപദ്ധതികള്‍ ആവിഷ്‌കരിക്കുമെന്നും മന്ത്രി പറഞ്ഞു. മന്ത്രിയുടെ വിശദീകരണത്തെ തുടര്‍ന്ന് സ്പീക്കര്‍ അനൗദ്യോഗിക ബില്ലിന് അവതരണാനുമതി നിഷേധിച്ചു.