കൊല്ലം: പൊലിസ് ഓഫിസേഴ്‌സ് അസോസിയേഷനിലേക്കു 13ന് നടക്കുന്ന തെരഞ്ഞെടുപ്പില്‍ സ്ഥാനാര്‍ഥികളായവരെ ഭീഷണിപ്പെടുത്തുന്നതായി വ്യാപകമായി പരാതി ഉയരുന്നുണ്ടെന്ന് ഡി.സി.സി പ്രസിഡന്റ് ബിന്ദു കൃഷ്ണ.
യു.ഡി.എഫ് ഭരിക്കുമ്പോള്‍ നടന്ന അസോസിയേഷന്‍ നീതിപൂര്‍വമായ തെരഞ്ഞെടുപ്പുകളില്‍ സ്വതന്ത്രമായി മത്സരിക്കാന്‍ എല്ലാവര്‍ക്കും അവകാശം ഉണ്ടായിരുന്നു. ജനാധിപത്യ ക്രമത്തില്‍ സ്ഥാനാര്‍ഥിയായി മത്സരിക്കാനും വോട്ടു ചെയ്യാനുമുള്ള അവകാശം ഉള്ളപ്പോള്‍ ഭരണകക്ഷിയുടെ ചൊല്‍പ്പടിക്കു നില്‍ക്കാതെ സ്ഥാനാര്‍ഥികളായവരെ സ്ഥലം മാറ്റുമെന്നും മറ്റും ഭരണകക്ഷിയുടെ ആഭിമുഖ്യമുള്ള സംഘടനാ നേതാക്കള്‍ ഭീഷണിപ്പെടുത്തുകയാണ്.
ഈ സാഹചര്യത്തില്‍ നീതിപൂര്‍വ്വവും നിഷ്പക്ഷവുമായി തെരഞ്ഞെടുപ്പ് നടത്താന്‍ ബന്ധപ്പെട്ടവര്‍ ശ്രദ്ധിക്കണമെന്നു ബിന്ദുകൃഷ്ണ പ്രസ്താവനയില്‍ ആവശ്യപ്പെട്ടു.