ചവറ: നിരാഹാര സമരം നടന്നു വരുന്ന ഐ.ആര്‍.ഇയിലേക്ക് പ്രകടനവുമായെത്തിയ ഡി.വൈ.എഫ്.ഐ പ്രവര്‍ത്തകര്‍ ഗേറ്റ് കടന്ന് കമ്പനിക്കുള്ളില്‍ നടത്തിയ പ്രതിഷേധ പ്രകടനം അക്രമാസക്തമായി. ഓഫിസിനു മുന്നിലെ ചെടിച്ചട്ടികള്‍ പ്രതിഷേധക്കാര്‍ നശിപ്പിച്ചു. പോര്‍ച്ചില്‍ കിടന്ന കാറിന് നേരെ തിരിഞ്ഞതോടെ ചവറ സി.ഐയും, എസ്.ഐയും ബലം പ്രയോഗിച്ച് പ്രവര്‍ത്തകരെ പിന്തിരിപ്പിക്കുകയായിരുന്നു. നേതാക്കളുടെ സാന്നിധ്യത്തിലായിരുന്നു പ്രവര്‍ത്തകരുടെ കൈയേറ്റം. സമരാനുകൂലികള്‍ക്ക് ഐക്യദാര്‍ഡ്യവുമായി എത്തിയ പ്രവര്‍ത്തകര്‍ അപ്രതീക്ഷിതമായി കമ്പനിക്കുള്ളില്‍ കടക്കുകയായിരുന്നു.
കമ്പനിയിലേക്കുള്ള വാഹനങ്ങളെയും ജിവനക്കാരെയും തടഞ്ഞ പ്രവര്‍ത്തകരെ പൊലിസ് പിന്തിരിപ്പിച്ചതിന് പിന്നാലെയാണ് പ്രകടനം നടത്തിയത്. കമ്പനി സെക്യൂരിറ്റിക്കാര്‍ നോക്കിനില്‍ക്കെയാണ് അന്‍പതോളം വരുന്ന പ്രവര്‍ത്തകര്‍ മുദ്രാവാക്യം വിളികളോടെ കമ്പനിക്കുള്ളില്‍ കയറിയത്. സെക്യുരിറ്റി ജീവനക്കാരുടെ അഭാവത്തില്‍ പോലിസ് ഇടപെട്ടാണ് ഡി.വൈ.എഫ്.ഐ പ്രവര്‍ത്തകരെ പുറത്താക്കിയത്. ഡി.വൈ.എഫ്.ഐ നേതാക്കളായ അഭിലാഷ്, അനില്‍, അജീഷ്, രതീഷ്, സംജിത്ത്, മനീഷ് എന്നിവരുടെ നേതൃത്വത്തിലായിരുന്നു പ്രകടനം. കമ്പനിക്കുള്ളില്‍ പ്രകടനവും അക്രമവും നടത്തിയതിനെതിരെ ജീവനക്കാര്‍ പ്രതിഷേധിച്ചു. അനുമതിയില്ലാതെ കമ്പനിയില്‍ പ്രവേശിച്ചതിനും അക്രമം നടത്തിയതിനും പ്രവര്‍ത്തകര്‍ക്കെതിരെ പൊലിസ് കേസെടുത്തു.