ഗൂഡല്ലൂര്‍: റോഡ് മുറിച്ച് കടക്കുന്നതിനിടെ മാന്‍ കാറിടിച്ച് ചത്തു, യാത്രക്കാരില്‍ നിന്ന് വനംവകുപ്പ് അരലക്ഷം രൂപ പിഴയീടാക്കി. ഗൂഡല്ലൂര്‍ മൈസൂര്‍ റോഡില്‍ മുതുമല കടുവ സങ്കേതത്തിലെ തുറപ്പള്ളി അഭയാരണത്തിന് സമീപത്താണ് സംഭവം.
മലപ്പുറം സ്വദേശികളായ അഞ്ചു യുവാക്കള്‍ യാത്ര ചെയ്ത കാറാണ് അപകടത്തില്‍പ്പെട്ടത്. മൈസുരിവില്‍ നിന്ന് തിരിച്ചുവരികയായിരുന്ന സംഘം സഞ്ചരിച്ച കാറിന് മുന്നിലേക്ക് മാന്‍ ചാടുകയായിരുന്നു. പെട്ടെന്നുണ്ടായ സംഭവത്തില്‍ വാഹനമോടിച്ചയാള്‍ കാര്‍ ബ്രേക്ക് ചെയ്‌തെങ്കിലും മാനിനെ ഇടിച്ചുത്തെറിപ്പിച്ചാണ് കാര്‍ നിന്നത്. സംഭവമറിഞ്ഞ് സ്ഥലത്തെത്തിയ കാര്‍ഗുഡി ഫോറസ്റ്റ് റെയിഞ്ചര്‍ കാന്തന്റെ നേതൃത്വത്തിലുള്ള സംഘമാണ് കാര്‍ കസ്റ്റഡിയിലെടുത്തത്. തുടര്‍ന്ന് ഇവരുടെമേല്‍ അരലക്ഷം രൂപ പിഴ ചുമത്തി. പിഴയടച്ചതിന് ശേഷമാണ് യാത്രക്കാരെയും കാറും വിട്ടയച്ചത്.