മുവാറ്റുപുഴ: കെ.എസ്.ആര്‍.ടി.സി ബസ് ഡ്രൈവറെയും, കണ്ടക്ടറെയും മര്‍ദിച്ച നാല് പേരെ മുവാറ്റുപുഴ പോലീസ് കസ്റ്റഡിയിലെടുത്തു.പെരുബാവൂര്‍ ഡിപ്പോയിലെ ഡ്രൈവറായ പേഴക്കാപ്പിളളി കാഞ്ഞിരക്കാട്ട് കുടിയില്‍ കെ.പി.കബീര്‍(47) കണ്ടക്ടര്‍ ആനിക്കാട് അടൂപറമ്പ് കാഞ്ഞിരക്കാട്ട് കെ.ഇ.റഫീക്ക്(40) എന്നിവരെയാണ് കഴിഞ്ഞ ദിവസം രാത്രി ഒന്‍പത് മണിയോടെ ക്വാളീസില്‍ എത്തിയ നാലംഗ സംഘം മുവാറ്റുപുഴ കെ.എസ്.ആര്‍.ടി.സി ഡിപ്പോയ്ക്ക് മുന്നില്‍ വച്ച് ആക്രമിച്ചത്.
റോഡരുകില്‍ പാര്‍ക്ക് ചെയ്തിരുന്ന ബസിന് മുന്നില്‍ ക്വാളീസ് നിര്‍ത്തി ഇട്ടിരുന്നതിനെ തുടര്‍ന്ന് ബസ് ഹോണ്‍ മുഴക്കിയ താണ് കൈയ്യാങ്കളിയില്‍ കലാശിച്ചത്. ക്വാളീസില്‍ നിന്നും ഇറങ്ങിയവര്‍ ജീവനക്കാരെ അസഭ്യം പറയുകയും കൈയ്യേറ്റം ചെയ്യുകയുമായിരുന്നു. കണ്ടക്ടറുടെ കൈയ്യിലിരുന്ന ടിക്കറ്റ് മെഷീനും സംഘം തല്ലിതകര്‍ത്തു.സംഭവത്തിന് ശേഷം ക്വാളീസില്‍ രക്ഷപെടാനുള്ള ശ്രമം നടത്തിയെങ്കിലും നാട്ടുകാര്‍ ഇടപെട്ടതിനെ തുടര്‍ന്ന് വിഭലമായി. വിവരമറിഞ്ഞ് സ്ഥലത്തെത്തിയ പോലീസ് നാല് പേരെയും കസ്റ്റഡിയിലെടുക്കുകയായിരുന്നു.പരിക്കേറ്റ ബസ് ജീവനക്കാരെ മുവാറ്റുപുഴ ജനറല്‍ ആശുപത്രിയില്‍ പ്രവേശിപ്പിച്ചു.