തിരുവനന്തപുരം: സ്വര്‍ണക്കടത്തുകേസില്‍ മുന്‍ ഐ.ടി സെക്രട്ടറി എം ശിവശങ്കറിനു കുരുക്കു മുറുകുന്നതായി സൂചന. കഴിഞ്ഞ ദിവസം കസ്റ്റംസ് ഇദ്ദേഹത്തിന്റെ ഫ്‌ളാറ്റില്‍ തിരച്ചില്‍ നടത്തി. ഇവിടെനിന്നു പല രേഖകളും സംഘം പരിശോധിക്കാനായി പിടിച്ചെടുത്തിട്ടുണ്ട്. ഫ്‌ളാറ്റിലെ സന്ദര്‍ശക രജിസ്റ്ററും സംഘം കസ്റ്റഡിയിലെടുത്തിട്ടുണ്ട്.
സെക്രട്ടേറിയറ്റിനു സമീപത്തുള്ള ഫ്‌ളാറ്റിലെ നാലാം നിലയിലാണ് ശിവശങ്കര്‍ ഒരു വര്‍ഷമായി താമസിക്കുന്നത്.
സ്വര്‍ണക്കടത്ത് കേസിലെ പ്രതി സരിത്തുമായി ശിവശങ്കര്‍ ഈ ഫ്‌ളാറ്റില്‍ വച്ച് ചര്‍ച്ച നടത്തിയെന്നാണ് വിവരം. ഇതിന്റെ അടിസ്ഥാനത്തിലാണ് കസ്റ്റംസ് പരിശോധന നടത്തിയത്.

റീ ബില്‍ഡ് കേരളയുടെ ഓഫീസ് പ്രവര്‍ത്തിക്കുന്നതും ഇതേ ഫ്‌ളാറ്റിലാണ്. സെക്രട്ടേറിയറ്റില്‍ സ്ഥലമുണ്ടായിട്ടും ലക്ഷങ്ങള്‍ വാടക കൊടുത്ത് ഫ്‌ളാറ്റില്‍ ഓഫീസ് മുറി കണ്ടെത്തിയത് നേരത്തെയും വിവാദത്തിന് ഇടയാക്കിയിരുന്നു.
കസിലെ മുഖ്യപ്രതി സ്വപ്‌ന സുരേഷുമായി ഇദ്ദേഹത്തിനുണ്ടെന്നു പറയുന്ന ബന്ധങ്ങളെക്കുറിച്ച് കൂടുതലറിയുന്നതിനായാണ് രേഖകള്‍ കസ്റ്റഡിയിലെടുത്തത്. അതേ സമയം കേസില്‍ അന്വേഷണം നടക്കട്ടെ എന്നും ഇപ്പോഴൊന്നും പ്രതികരിക്കുന്നില്ലെന്നുമാണ് വി.ശിവശങ്കരന്റെ പ്രതികരണം.