ഗാലെ: ടെസ്റ്റ് ക്രിക്കറ്റിൽ ഫീൽഡിങ്ങിൽ തകർപ്പൻ റെക്കോർഡുമായി ഓസ്‌ട്രേലിയൻ സൂപ്പർതാരം സ്റ്റീവ് സ്മിത്ത്. ശ്രീലങ്കക്കെതിരെയുള്ള അവസാന ടെസ്റ്റ് മത്സരത്തിൽ നേടിയ രണ്ട് ക്യാച്ചുകളാണ് സ്റ്റീവ് സ്മിത്ത് നേടിയത്.

ഇതോടെ ഓസ്‌ട്രേലിയക്കായി ടെസ്റ്റ് ക്രിക്കറ്റിൽ കീപ്പർ എന്ന നിലയിൽ അല്ലാതെ ഏറ്റവും കൂടുതൽ ക്യാച്ചുകൾ നേടുന്ന താരമായി മാറാനാണ് സ്മിത്തിന് സാധിച്ചത്. റെഡ് ബോൾ ക്രിക്കറ്റിൽ 197 ക്യാച്ചുകളാണ് താരം നേടിയത്. 196 ക്യാച്ചുകൾ നേടിയ മുൻ ഓസീസ് നായകൻ റിക്കി പോണ്ടിങ്ങിനെ മറികടന്നാണ് സ്മിത്ത് ഈ നേട്ടം സ്വന്തമാക്കിയത്. 

മത്സരത്തിൽ ആദ്യ ദിവസം കളി നിർത്തുമ്പോൾ ശ്രീലങ്ക ഒമ്പത് വിക്കറ്റ് നഷ്ടത്തിൽ 229 റൺസാണ് നേടിയത്. ഓസ്‌ട്രേലിയൻ ബൗളിങ്ങിൽ മിച്ചൽ സ്റ്റാർക്ക്, നഥാൻ ലിയോൺ എന്നിവർ മൂന്ന് വിക്കറ്റും മാത്യു കുഹ്‌നെമാൻ രണ്ട് വിക്കറ്റും ട്രാവിസ് ഹെഡ് ഒരു വിക്കറ്റും നേടി മികച്ച പ്രകടനം നടത്തി. 

ശ്രീലങ്കക്കായി ദിനേശ് ചന്ദിമൽ 163 പന്തിൽ 73 റൺസും കുശാൽ മെൻഡിസ് 107 പന്തിൽ 59 റൺസും നേടി മികച്ച പ്രകടനം നടത്തി. പരമ്പരയിലെ ആദ്യ മത്സരത്തിൽ തകർപ്പൻ വിജയമായിരുന്നു ഓസ്ട്രേലിയ സ്വന്തമാക്കിയത്. ഈ മത്സരം വിജയിച്ചാൽ ഓസ്‌ട്രേലിയക്ക് പരമ്പര സ്വന്തമാക്കാൻ സാധിക്കും, എന്നാൽ മത്സരം വിജയിച്ചുകൊണ്ട് പരമ്പര സമനിലയിലാക്കാൻ ആയിരിക്കും ശ്രീലങ്ക ലക്ഷ്യം വെക്കുക.