ദുബൈ: പുണ്യ റമദാന്‍ മാസത്തിന് 30 ദിവസത്തില്‍ താഴെ മാത്രം ശേഷിക്കെ, യുഎഇയിലെ ചില്ലറ വ്യാപാരികള്‍ തമാസക്കാരുടെ ഒഴുക്ക് പ്രതീക്ഷിച്ചിരിക്കുകയാണ്. പലയിടത്തും 70 ശതമാനം വരെ കിഴിവുകളാണ് ഉപഭോക്താക്കള്‍ക്കായി ഓഫര്‍ ചെയ്തിരിക്കുന്നത്.

റമദാന്‍ മാസത്തില്‍ വില്‍പ്പന സാധാരണയായി വര്‍ധിക്കുമെന്നാണ് വിദഗ്ദ്ധര്‍ പറയുന്നത്. ഡിസ്‌കൗണ്ടുകള്‍ പ്രയോജനപ്പെടുത്തുന്നതിനായി നിരവധി താമസക്കാര്‍ വലിയ വിലയ്ക്ക് സാധനങ്ങള്‍ വാങ്ങാന്‍ എത്തുമെന്നു തന്നെയാണ് കച്ചവടക്കാരും പ്രതീക്ഷിക്കുന്നത്. റമദാന്‍ മാസത്തില്‍ വലിയ ഒത്തുചേരലുകള്‍ നടക്കുന്നതിനാല്‍ പലരും ഈ കാലയളവില്‍ കൂടുതല്‍ ചെലവഴിക്കാനുള്ള പ്രവണതയുണ്ട്.

യുഎഇയിലെ പ്രമുഖ റീട്ടെയിലര്‍മാര്‍ക്കറ്റുകള്‍, ഹൈപ്പര്‍മാര്‍ക്കറ്റുകള്‍, ഹോം ഫര്‍ണിഷിംഗ് സ്ഥാപനങ്ങള്‍, ഇലക്ട്രോണിക്‌സ് റീട്ടെയിലര്‍മാര്‍, ഓട്ടോമൊബൈല്‍ വിതരണക്കാര്‍ എന്നിവര്‍ ഇതിനകം തന്നെ വന്‍ കിഴിവുകള്‍ പ്രഖ്യാപിച്ചിട്ടുണ്ട്.

ദുബൈ ആസ്ഥാനമായുള്ള റീട്ടെയിലര്‍ കമ്പനിയായ യൂണിയന്‍ കോപ്പ് വ്യാഴാഴ്ച യുഎഇയുടെ 'ഇയര്‍ ഓഫ് ദി കമ്മ്യൂണിറ്റി' സംരംഭത്തിന് അനുസൃതമായി 2025 റമദാന്‍ കാമ്പെയ്‌ന് തുടക്കം കുറിച്ചു. ഇവര്‍ വിശുദ്ധ മാസത്തിനായി ഓണ്‍ലൈന്‍, ഓഫ്‌ലൈന്‍ പ്ലാറ്റ്‌ഫോമുകളില്‍ 5,000ത്തിലധികം ഭക്ഷ്യ, ഭക്ഷ്യേതര ഉല്‍പ്പന്നങ്ങള്‍ക്ക് 60 ശതമാനം വരെ കിഴിവുകള്‍ വാഗ്ദാനം ചെയ്യുന്നു.

അരി, മാംസം, കോഴിയിറച്ചി, ടിന്നിലടച്ച ഭക്ഷണങ്ങള്‍, ഉയര്‍ന്ന ഡിമാന്‍ഡുള്ള മറ്റ് റമദാന്‍ ഇനങ്ങള്‍ എന്നിവയുള്‍പ്പെടെ 200ലധികം അവശ്യ വസ്തുക്കളുടെ വില കുറയാനിടയുണ്ട്. യുഎഇയിലെ 42ലധികം ഫാമുകളുമായി പങ്കാളിത്തത്തില്‍ ഏര്‍പ്പെട്ടുകൊണ്ട്, പുതിയതും ജൈവവുമായ ഉല്‍പ്പന്നങ്ങള്‍ വിതരണം ചെയ്യുന്നതിലൂടെ ഇവര്‍ പ്രാദേശിക കൃഷിയെ പിന്തുണയ്ക്കുകയും ചെയ്യുന്നുണ്ട്.

റമദാനില്‍ ഒന്നിലധികം ഉല്‍പ്പന്ന വിഭാഗങ്ങളില്‍ ആകര്‍ഷകമായ ഡീലുകളും ട്രേഡ്ഇന്‍ ഓഫറുകളും ഉപഭോക്താക്കള്‍ക്ക് പ്രതീക്ഷിക്കാമെന്ന് ജംബോ ഇലക്ട്രോണിക്‌സിന്റെ സിഇഒ വികാസ് ഛദ്ദ പറഞ്ഞു.

'ഈ പ്രത്യേക സീസണില്‍ ഞങ്ങളുടെ ഉപഭോക്താക്കള്‍ക്ക് ഷോപ്പിംഗ് എളുപ്പവും പ്രതിഫലദായകവുമാക്കുക എന്നതാണ് ഞങ്ങളുടെ ലക്ഷ്യം... റമദാനില്‍ ഞങ്ങള്‍ 50 ശതമാനം വരെ കിഴിവ് വാഗ്ദാനം ചെയ്യും. എല്ലാ ഇലക്ട്രോണിക്, ഉപകരണ വിഭാഗങ്ങളിലും കിഴിവുകള്‍ ബാധകമായിരിക്കും,' ചദ്ദ പറഞ്ഞു.

യുഎഇയെ സംബന്ധിച്ചിടത്തോളം റമദാന്‍ വലിയ പ്രാധാന്യമുള്ളതാണെന്നും അതിനാല്‍, ഈ മാസം ഏറ്റവും ആകര്‍ഷകമായ ചില പ്രമോഷനുകളും ട്രേഡ്ഇന്‍ ഡീലുകളും വാഗ്ദാനം ചെയ്യുന്നതില്‍ അവര്‍ ശ്രദ്ധ കേന്ദ്രീകരിക്കുന്നുവെന്നും അദ്ദേഹം കൂട്ടിച്ചേര്‍ത്തു.