കൊച്ചി: കലൂരിലെ ഇഡ്‌ലിക്കടയിലുണ്ടായ സ്റ്റീമര്‍ പൊട്ടിത്തെറി വിശദീകരിച്ച് ദൃക്‌സാക്ഷി. 'ബോംബ് പൊട്ടുന്ന ശബ്ദത്തോടെയാണ് സ്റ്റീമര്‍ പൊട്ടി തെറിച്ചത്. സൗണ്ട് കേട്ടിട്ടാ ഞങ്ങള്‍ ഓടിവന്നത്, ഒരാള്‍ക്ക് അപകടത്തില്‍ പൊള്ളലേറ്റ് തൊലി മൊത്തം പോയിരുന്നു. കണ്ടു നില്‍ക്കാന്‍ കഴിയാത്ത സാഹചര്യമായിരുന്നു ഉണ്ടായിരുന്നത്. പരുക്കേറ്റവരെ കാറുകളില്‍ ഉടന്‍ തന്നെ ആശുപത്രിയില്‍ എത്തിക്കുകയായിരുന്നു. ഒരു തൊഴിലാളിക്ക് തലയ്ക്ക് ഗുരുതരമായ പരുക്കേറ്റിട്ടുണ്ട്' ദൃക്‌സാക്ഷി പറഞ്ഞു.

അതേസമയം തന്നെ ഹോട്ടലില്‍ ഭക്ഷണം കഴിക്കാനായി അന്‍പതോളം പേര്‍ ഉണ്ടായിരുന്നു. ആളുകള്‍ ഇരിക്കുന്നിടത്തേക്ക് പൊട്ടിത്തെറി ഉണ്ടാവാതിരുന്നത് ആശ്വാസമായെന്നും ദൃക്‌സാക്ഷി പറയുന്നു.

ഇന്ന് വൈകുന്നേരം നാലു മണിക്കാണ് സംഭവം. അപകടത്തില്‍ കിരണ്‍ (ഒഡിഷ), അലി (അസം) ലുലു, കൈക്കോ നബി( നാഗാലാന്‍ഡ്) എന്നിവര്‍ക്കാണ് പരുക്കേറ്റിരിക്കുന്നത്. ഒരാള്‍ മരിച്ചു. ഗുരുതരാവസ്ഥയിലായ ഒരാളെ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല.