ജിദ്ദ: വിദേശ രാജ്യങ്ങളിൽ നിന്ന് വരുന്ന ഉംറ തീർത്ഥാടകർ നിർബന്ധമായും വാക്സിനേഷൻ സ്വീകരിച്ചിരിക്കണമെന്ന നിയമം പിൻവലിച്ചു. ഫെബ്രുവരി 10 മുതൽ പ്രാബല്യത്തിൽ വരുമെന്ന് നേരത്തെ അറിയിച്ചിരുന്നു. ഇതാണ് ഇപ്പോൾ പിൻവലിച്ചത്. ഇത് സംബന്ധിച്ച് സഊദി സിവിൽ ഏവിയേഷൻ അതോറിറ്റി (GACA) വിമാന കമ്പനികൾക്ക് സർക്കുലർ അയച്ചു.

സ്വകാര്യ വിമാന കമ്പനികൾ ഉൾപ്പെടെ സഊദിയിലേക്ക് സർവ്വീസ് നടത്തുന്ന എല്ലാ വിമാന കമ്പനികൾക്കും ഇത് ബാധകമാണന്ന് സർക്കുലറിൽ വ്യക്തമാക്കിയിട്ടുണ്ട്.

ജനുവരി 7 ന് ഗാക പുറത്തിറക്കയ 2/15597 നമ്പർ സർക്കുലറിലാണ് സഊദിയിലേക്ക് വരുന്ന എല്ലാ ഉംറ തീർഥാടകരും Neisseria Meningitidis വാക്സിൻ എടുക്കണമെന്ന് അറിയിച്ചിരുന്നത്. ഓരോ രാജ്യത്ത് നിന്നും യാത്ര പുറപ്പെടുന്നതിന് മുമ്പ് തന്നെ തീർഥാടകരുടെ വാക്സിനേഷൻ സർട്ടിഫിക്കറ്റുകൾ പരിശോധിച്ച് ഉറപ്പ് വരുത്തണമെന്നും ആ സർക്കുലറിൽ വിമാന കമ്പനികൾക്ക് നിർദ്ദേശം നൽകിയിരുന്നു.

പുതിയ നിർദേശത്തോടെ വാക്സിൻ ഇല്ലാതെ തന്നെ സഊദിയിലേക്ക് ഉംറക്കാർക്ക് വരാനാകും.