മലപ്പുറം: എടപ്പാളില്‍ 10 വയസുള്ള നാടോടി ബാലികയ്ക്ക് ക്രൂരമര്‍ദ്ദനം. ആക്രി സാധനങ്ങള്‍ പെറക്കുന്നതിനിടെയാണ് മര്‍ദ്ദനമേറ്റത്. സംഭവത്തില്‍ വട്ടംകുളം മുന്‍പഞ്ചായത്ത് പ്രസിഡന്റിനെതിരെ പൊലിസ് കസ്റ്റഡിയിലെടുത്തു. സി.പി.എം ഏരിയാ കമ്മിറ്റിയംഗം കൂടിയായ മുന്‍ പ്രസിഡന്റാണ് ബാലികയെ മര്‍ദ്ദിച്ചത്. പ്രതിക്കെതിരെ ജാമ്യമില്ലാവകുപ്പ് പ്രകാരമാണ് കേസ് എടുത്തത്.

എടപ്പാള്‍ ആശുപത്രിക്ക് സമീപത്തെ കെട്ടിടത്തില്‍ നിന്നും ബാലിക ആക്രി സാധനങ്ങള്‍ പെറുക്കുകയായിരുന്നു. കുട്ടിയുടെ കൂടെ അമ്മയും സഹോദരിയും ഉണ്ടായിരുന്നു. ഇവരും ആക്രി സാധനങ്ങള്‍ പെറുക്കുകയായിരുന്നു. എന്നാല്‍ ഇത് തടയാന്‍ ശ്രമിച്ചവര്‍ തന്നെയാണ് കുട്ടിയെ മര്‍ദ്ദിച്ചതെന്നാണ് വിവരം. മര്‍ദ്ദനമേറ്റ് കുട്ടിയെ എടപ്പാളിലെ സര്‍ക്കാര്‍ ആശുപത്രിയില്‍ പ്രവേശിപ്പിച്ചു.

രാവിലെ പത്ത് മണിയോടെയാണ് സംഭവം. മര്‍ദ്ദിച്ചത് പ്രദേശവാസിയാണെന്നാണ് പെണ്‍കുട്ടിയുടെ മൊഴി.പൊലീസ് മൊഴി രേഖപ്പെടുത്തിയിട്ടുണ്ട്. ഇവര്‍ വര്‍ഷങ്ങളായി പൊന്നാനിയില്‍ താമസിക്കുകയാണ്.