തൃശൂര്‍: തിരുവനന്തപുരം സ്വര്‍ണ്ണക്കള്ളക്കടത്തു കേസ് പ്രതി സ്വപ്‌ന സുരേഷിനെ തൃശൂരിലെ കൊവിഡ് നിരീക്ഷണ കേന്ദ്രത്തില്‍ എത്തിച്ചു. മിഷന്‍ ക്വാട്ടേഴ്‌സ് റോഡിലെ റിമാന്‍ഡ് തടവുകാര്‍ക്കുള്ള അമ്പിളിക്കല ഹോസ്റ്റലിലേക്കാണ് വൈകീട്ട് സ്വപ്‌നയെ എത്തിച്ചത്.

കൊവിഡ് പരിശോധനാഫലം വരുന്നതു വരേക്കാണ് സ്വപ്‌നയെ കൊവിഡ് കെയര്‍ സെന്ററില്‍ താമസിപ്പിക്കുക.പരിശോധനാ ഫലം നെഗറ്റീവ് ആയാല്‍ സ്വപ്‌നയെ കൊച്ചിയിലേക്ക് തിരികേ കൊണ്ടുപോകും. ഇവരുടെ പരിശോധനാ ഫലം നാളെ തന്നെ ലഭ്യമാകുമെന്നാണ് സൂചന.

സ്വപ്‌നയെ തൃശൂരിലേക്ക് കൊണ്ടുവരുമെന്ന വിവരം പുറത്തുവന്നതിനു പിന്നാലെ അമ്പളിക്കല ഹോസ്റ്റല്‍ പരിസരത്ത് കനത്ത പൊലിസ് സുരക്ഷ ഏര്‍പ്പെടുത്തിയിരുന്നു.സിറ്റി പൊലിസ് കമ്മീഷണര്‍ നേരിട്ടെത്തി സുരക്ഷ നിയന്ത്രിച്ചു.അസി.കമ്മീഷണര്‍ വി.കെ രാജുവിന്റെ നേതൃത്വത്തില്‍ 70 പേരടങ്ങുന്ന പൊലിസ് സംഘം കൊവിഡ് കെയര്‍ സെന്ററിന് കാവലായുണ്ട്.നിലവില്‍ 25 ഓളം റിമാന്‍ഡ് തടവുകാര്‍ നിലവില്‍ ഇവിടെയുണ്ട്.