തോല്‍പ്പെട്ടി: ബൈക്കില്‍ കടത്തുകയായിരുന്ന മൂന്നര കിലോ മാനിറച്ചിയുമായി യുവാക്കള്‍ പിടിയില്‍.
തോല്‍പ്പെട്ടി എക്‌സൈസ് ചെക്ക് പോസ്റ്റില്‍ അധികൃതര്‍ നടത്തിയ വാഹന പരിശോധനയിലാണ് ഇവര്‍ പിടിയിലായത്. തലശ്ശേരി മാഹി സ്വദേശികളായ പള്ളൂര്‍ മീത്തലപറമ്പത്ത് ബിജേഷ് (33), പള്ളൂര്‍ ഉപ്പളക്കണ്ടിയില്‍ അജേഷ് (39) എന്നിവരെയാണ് മാനന്തവാടി എക്‌സൈസ് ഇന്‍സ്‌പെക്ടര്‍ എം.കെ സുനിലിന്റെ നേതൃത്വത്തിലുള്ള എക്‌സൈസ് സംഘം അറസ്റ്റ് ചെയ്തത്. മസാല പുരട്ടി ചാക്കില്‍ ഒളിപ്പിച്ച നിലയിലായിരുന്നു മാനിറച്ചി സൂക്ഷിച്ചിരുന്നത്. ഇവര്‍ സഞ്ചരിച്ചിരുന്ന ബൈക്കും കസ്റ്റഡിയിലെടുത്തിട്ടുണ്ട്. കര്‍ണാടക ഭാഗത്ത് നിന്നും വരുകയായിരുന്നു ഇരുവരും. അതിര്‍ത്തി ഗ്രാമങ്ങളില്‍ നിന്നും സംഘടിപ്പിച്ച ഇറച്ചിയാണെന്ന് കരുതുന്നതായി ഉദ്യോഗസ്ഥര്‍ പറഞ്ഞു. സി.ഇ.ഒ മാരായ കെ.പി പ്രമോദ്, എ.സി ചന്ദ്രന്‍, അമല്‍ദേവ്, വിപിന്‍ വില്‍സണ്‍, അനുദാസ്, പ്രിന്‍സ് ടി.ജി, അഖില്‍ എന്നിവര്‍ വാഹന പരിശോധനക്ക് നേതൃത്വം നല്‍കി. പിന്നീട് പ്രതികളെ വനം വകുപ്പിന് കൈമാറി.