ബാഴ്‌സലോണ: ലാലിഗയില്‍ ജയം തുടര്‍ന്ന് ബാഴ്‌സലോണ. കഴിഞ്ഞ ദിവസം നടന്ന മത്സരത്തില്‍ എതിരില്ലാത്ത ഒരു ഗോളിന് വയ്യഡോളിഡിനെയാണ് ബാഴ്‌സലോണ പരാജയപ്പെടുത്തിയത്. 15ാം മിനുട്ടില്‍ അര്‍തുറോ വിദാലിന്റെ വകയായിരുന്നു ബാഴ്‌സയുടെ വിജയ ഗോള്‍. ഇതോടെ 36 മത്സരത്തില്‍ നിന്ന് ബാഴ്‌സലോണക്ക് 79 പോയിന്റായി.
മറ്റൊരു മത്സരത്തില്‍ 2-1 എന്ന സ്‌കോറിന് ഒസാസുന സെല്‍റ്റ വിഗോയെ പരാജയപ്പെടുത്തി. മറ്റൊരു മത്സരത്തില്‍ എതിരില്ലാത്ത ഒരു ഗോളിന് അത്‌ലറ്റിക്കോ മാഡ്രിഡ് റയല്‍ ബെറ്റിസിനെ പരാജയപ്പെടുത്തി. ഇതോടെ 36 മത്സരത്തില്‍ നിന്ന് അത്‌ലറ്റിക്കോക്ക് 66 പോയിന്റായി.
ഗ്രിസ്മാന് പരുക്ക്,
സീസണ്‍ നഷ്ടമായേക്കും
കഴിഞ്ഞ ദിവസത്തെ മത്സരത്തിനിടെ പരുക്കേറ്റ ഗ്രിസ്മാന്‍ ലാലിഗയില്‍ ഇനി കളിച്ചേക്കില്ല. വയ്യഡോളിഡിനെതിരേയുള്ള മത്സരത്തില്‍ ഗ്രിസ്മാന്‍ ആദ്യ ഇലവനില്‍ കളത്തിലിറങ്ങിയിരുന്നു.
പിന്നീട് പരുക്കേറ്റതിനെ തുടര്‍ന്ന് താരത്തെ പിന്‍വലിക്കുകയായിരുന്നു. 120 മില്യന്‍ യൂറോ നല്‍കിയായിരുന്നു ഗ്രിസ്മാനെ അത്‌ലറ്റിക്കോ മാഡ്രിഡില്‍ നിന്ന് ബാഴ്‌സലോണയിലെത്തിച്ചത്.