വടകര: ബി.സോണ്‍ കലോത്സവത്തിലെ മിമിക്രി മത്സരത്തില്‍ സദസിനെ പൊട്ടിച്ചിരിപ്പിച്ച് ഫാറൂഖ് കോളജില്‍ നിന്നുള്ള ആദില്‍ ജഹാന്‍. കഴിഞ്ഞ വര്‍ഷത്തെ ഇന്റര്‍സോണ്‍ വിജയികൂടിയായ ആദില്‍ ഇത്തവണ വേറിട്ട ശബ്ദാനുകരണമാണ് കാഴ്ച വച്ചത്. തൃശൂര്‍ പൂരത്തിന്റെ കൊമ്പുവിളിയില്‍ തുടങ്ങി വെടിക്കെട്ടില്‍ അവസാനിക്കുന്ന അഞ്ചു മിനുട്ടില്‍ 23 ഇനങ്ങള്‍ക്ക് ആദില്‍ ശബ്ദം നല്‍കി.
മത്സരഫലം വന്നപ്പോള്‍ ഈ മികച്ച പ്രകടനത്തിനായിരുന്നു ഒന്നാം സ്ഥാനം. ഫാറൂഖ് കോളജ് ഫൈന്‍ ആര്‍ട്‌സ് സെക്രട്ടറി കൂടിയായ ആദില്‍ സംസ്ഥാന സ്‌കൂള്‍ കലോത്സവത്തില്‍ മിമിക്രിയില്‍ മൂന്നു തവണ വിജയത്തിന്റെ മധുരം നുണഞ്ഞിട്ടുണ്ട്. കരുവാരക്കുണ്ട് പുന്നക്കാട് സ്വദേശിയും ദാറുന്നജാത്ത് യു.പി സ്‌കൂള്‍ ഹെഡ്മാസ്റ്ററുമായ നൗഷാദാണ് പിതാവ്. മാതാവ് സഹ്‌ല.