കൊണ്ടോട്ടി: സ്വര്‍ണക്കടത്തിനു സ്ത്രീ കരിയര്‍മാരുടെ എണ്ണം കൂടുമ്പോള്‍ കരിപ്പൂര്‍ കസ്റ്റംസില്‍ വനിതാ ജീവനക്കാര്‍ നാമമാത്രം. എയര്‍ കസ്റ്റംസില്‍ 46 ഉദ്യോഗസ്ഥരില്‍ അഞ്ചുപേര്‍ മാത്രമാണ് വനിതകള്‍. ഇവരില്‍ മൂന്നു പേര്‍ മാത്രമാണ് യാത്രക്കാരെ പരിശോധിക്കുന്ന ജോലിയിലുള്ളത്. കൊവിഡ് സമയത്തും സ്വര്‍ണക്കടത്ത് കൂടിയതോടെ എണ്ണത്തില്‍ കുറവായ വനിതാ ഉദ്യോഗസ്ഥര്‍ക്ക് വിശ്രമമില്ലാതെ ജോലി ചെയ്യേണ്ട അവസ്ഥയാണ് നിലവിലുള്ളത്.

കഴിഞ്ഞദിവസം റാസല്‍ഖൈമയില്‍നിന്ന് കരിപ്പൂരിലെത്തിയ തിരുവനന്തപുരം സ്വദേശിനി സീനമോളില്‍ നിന്ന് 1.8 കിലോ സ്വര്‍ണം പിടികൂടിയിരുന്നു. ഇവര്‍ സ്വര്‍ണം കടത്തുന്ന കരിയറാണെന്ന് കസ്റ്റംസിനു ബോധ്യമായിട്ടുണ്ട്. ഇവര്‍ നേരത്തെയും സ്വര്‍ണക്കടത്ത് നടത്തിയതടക്കം പരിശോധിച്ചു വരികയാണ്.

കഴിഞ്ഞവര്‍ഷം കരിപ്പൂരില്‍ പിടികൂടിയ സ്വര്‍ണത്തിന്റെ 20 ശതമാനവും പുറത്തുകടത്താന്‍ ശ്രമിക്കവെ പിടിയിലായത് സ്ത്രീകളായിരുന്നു. ഒരു വര്‍ഷത്തിനിടെ സ്ത്രീകള്‍ കരിയര്‍മാരായ 33 കേസുകളിലായി 10.35 കിലോ സ്വര്‍ണമാണ് കരിപ്പൂരില്‍ പിടികൂടിയത്. പിടിച്ചെടുത്തതിന്റെ പതിന്മടങ്ങ് സ്വര്‍ണം സ്ത്രീകള്‍ പുറത്തു കടത്തിയിട്ടുണ്ടാകുമെന്നാണ് കസ്റ്റംസ് കരുതുന്നത്. വനിതകളെ കരിയര്‍മാരായും ഇടനിലക്കാരായും സ്വര്‍ണക്കടത്തു മാഫിയ പ്രയോജനപ്പെടുത്തുന്നുണ്ടെന്നാണു വിവരം. വനിതാ ഉദ്യോഗസ്ഥര്‍ കുറവായതും സ്ത്രീകളെ സംശയിക്കില്ലെന്ന ധാരണയുമാണു ഇതിനുപിന്നില്‍.