റിയാദ്: വാഹനാപകടത്തെ തുടര്‍ന്ന് പിഴയിനത്തിലുള്ള 1.9 കോടി രൂപയോളം രൂപ നല്‍കാന്‍ കഴിയാതെ ജയിലില്‍ കഴിയുന്ന മുജീബിന്റെ ജയില്‍ മോചനത്തിനായി ജിദ്ദയില്‍ സഹായ കൂട്ടായ്മ രൂപീകരിച്ചു.

നാട്ടുകാരും രാഷ്ട്രീയ സാംസ്‌കാരിക രംഗത്തെ പ്രമുഖരും ബന്ധുക്കളും ഉള്‍പ്പെട്ട സഹായ കൂട്ടായ്മയാണ് ജിദ്ദയില്‍ രൂപീകരിച്ചത്. സ്വപ്‌നത്തില്‍ പോലും ഓര്‍ക്കാന്‍ കഴിയാത്ത ഇത്രയും വലിയ സംഖ്യ അടക്കാന്‍ കഴിയാതെ ഒരു വര്‍ഷത്തോളമായി കോഴിക്കോട് മുക്കം കാരമൂല സ്വദേശിയായ മുജീബ് ജയിലില്‍ കഴിയുകയാണ്.

ജയില്‍ മോചനത്തിനും നഷ്ടപരിഹാരത്തിനുമായുള്ള നടപടികള്‍ ത്വരിതപ്പെടുത്തുക, ഗള്‍ഫിലെ മറ്റു ഭാഗങ്ങളിലും കൂട്ടായ്മകള്‍ രൂപീകരിക്കുക തുടങ്ങിയവ ലക്ഷ്യമാക്കിയുള്ള സമിതിയുടെ ചെയര്‍മാന്‍ ഡോ: കാവുങ്ങല്‍ മുഹമ്മദ്, അബ്ദുല്‍ ഹഖ് തിരൂരങ്ങാടി ജനറല്‍ കണ്‍വീനറും അബ്ദുറഹ്മാന്‍ വണ്ടൂര്‍ ഫിനാന്‍സ് കോഡിനേറ്ററുമാണ്.

Read More… ഭീമമായ സംഖ്യ നഷ്ടപരിഹാരം നല്‍കാന്‍ കഴിയാതെ സ്വപ്‌നങ്ങള്‍ തകര്‍ന്നു മുക്കം സ്വദേശി സഊദിയില്‍ ജയിലില്‍

സമിതിയുടെ പ്രവര്‍ത്തനങ്ങള്‍ ഏകോപിപ്പിക്കുന്നതിനും വിപുലീകരിക്കുന്നതിനുമായി വെള്ളിയാഴ്ച ഷറഫിയയില്‍ വിപുലമായ യോഗം വിളിച്ചു ചേര്‍ത്തിട്ടുണ്ട്. യോഗത്തില്‍ പ്രാദേശിക സംഘടനാ പ്രതിനിധികള്‍, കല, സാഹിത്യ, സാമൂഹിക രംഗത്തെ മുഴുവന്‍ ആളുകളും പങ്കെടുക്കണമെന്ന് സംഘാടകര്‍ അഭ്യര്‍ത്ഥിച്ചു. മുജീബിന്റെ വാര്‍ത്ത വിശദമായി നേരത്തെ ഏപ്രില്‍ പതിനാലിന് 'സുപ്രഭാതം' റിപ്പോര്‍ട്ട് ചെയ്തിരുന്നു.

മുജീബിന്റെ മോചനത്തിനായി നാട്ടിലും പ്രവര്‍ത്തനങ്ങള്‍ ശക്തമാക്കിയിട്ടുണ്ട്. കേന്ദ്ര, സംസ്ഥാന സര്‍ക്കാരുകളുടെ സഹായം ലഭ്യമാക്കാന്‍ സമിതികള്‍ ശ്രമം തുടങ്ങിയിട്ടുണ്ട്.