തിരുവനന്തപുരം: സ്വാശ്രയ കോളജുകളില്‍ എം.ബി.ബി.എസ് പ്രവേശനത്തിന് വിദ്യാര്‍ഥികളെ പിഴിയുന്നത് അവസാനിപ്പിക്കാന്‍ അടിയന്തര നടപടി സ്വീകരിക്കണമെന്ന് പ്രതിപക്ഷ നേതാവ് രമേശ് ചെന്നിത്തല ആവശ്യപ്പെട്ടു.
പ്രവേശന സമയത്ത് ട്യൂഷന്‍ ഫീസും പ്രവേശന ഫീസും ഒഴികെ മറ്റു ഫീസുകള്‍ ഈടാക്കരുതെന്ന നിബന്ധന കാറ്റില്‍പറത്തി പല സ്വാശ്രയ കോളജുകളും തോന്നിയതു പോലെ ഫീസ് ഈടാക്കുന്നു എന്നാണ് പരാതി ഉയര്‍ന്നിട്ടുള്ളത്. പല പേരുകള്‍ പറഞ്ഞ് ചില കോളജുകള്‍ കുട്ടികളില്‍ നിന്ന് ലക്ഷങ്ങള്‍ ഈടാക്കുകയാണ്.
ഹയര്‍ ഓപ്ഷന്‍കിട്ടി കോളജ് മാറേണ്ടി വരുമ്പോള്‍ അധികമായി വാങ്ങുന്ന ഈ തുകയെല്ലാം നഷ്ടപ്പെടുന്ന അവസ്ഥയാണ്. കുട്ടികളുടെ രക്ഷയ്ക്കായി സര്‍ക്കാര്‍ അടിയന്തരമായി ഇടപെട്ട് നടപടി എടുക്കണമെന്ന് രമേശ് ചെന്നിത്തല ആവശ്യപ്പെട്ടു.