അന്വേഷണം നടത്തുമെന്ന് മെഡിക്കല്‍ കോളജ് സൂപ്രണ്ട്

അത്താണി (തൃശൂര്‍): മെഡിക്കല്‍ കോളജില്‍ ശസ്ത്രക്രിയക്കിടെ രോഗിയുടെ വയറ്റില്‍ കത്രിക മറന്നുവെച്ചു. വയറുവേദനയെ തുടര്‍ന്ന് എക്‌സ്‌റേ എടുത്തപ്പോള്‍ കണ്ടെത്തിയ കത്രിക സ്വകാര്യ ആശുപത്രിയില്‍ നടത്തിയ ശസ്ത്രക്രിയയിലൂടെ പുറത്തെടുത്തു. തൃശൂര്‍ മുളങ്കുന്നത്തുകാവ് മെഡിക്കല്‍ കോളജിലാണ് സംഭവം.  മഞ്ഞപിത്ത ബാധയെ തുടര്‍ന്ന് പാന്‍ക്രിയാസില്‍ അനുഭവപ്പെട്ട തടിപ്പ് നീക്കം ചെയ്യാന്‍ ശസ്ത്രക്രിയക്ക് വിധേയനായ കണിമംഗലം സ്വദേശി ജോസഫ് പോളിന്റെ വയറ്റിലാണ് കത്രിക മറന്നു വെച്ചത്. സംഭവത്തില്‍ മുളങ്കുന്നത്ത്കാവ് മെഡിക്കല്‍ കോളജിലെ ഡോക്ടര്‍ പോളി ടി.ജോസഫിനെതിരേ  തൃശൂര്‍ സിറ്റി അസിസ്റ്റന്റ് പൊലിസ് കമ്മിഷണര്‍ക്കും മെഡിക്കല്‍ കോളജ് സൂപ്രണ്ടിനും ജോസഫ് പോള്‍ പരാതി നല്‍കി.

 ഇക്കഴിഞ്ഞ ഏപ്രില്‍ ആദ്യ ആഴ്ചയിലാണ് മഞ്ഞപ്പിത്തത്തെ തുടര്‍ന്ന് ജോസഫ് പോള്‍ കൂര്‍ക്കഞ്ചേരിയിലെ ഒരു സ്വകാര്യ ആശുപത്രിയില്‍ ചികിത്സ തേടിയിരുന്നു. പാന്‍ക്രിയാസില്‍ തടിപ്പുണ്ടെന്നും ഉടന്‍ ശസ്ത്രക്രിയക്ക് വിധേയനാകണമെന്നും ആശുപത്രി അധികൃതര്‍ അറിയിച്ചു. എന്നാല്‍ സാമ്പത്തിക പ്രയാസത്തെ തുടര്‍ന്ന് മെഡിക്കല്‍ കോളജില്‍ ചികിത്സ തേടുകയായിരുന്നു. ഏപ്രില്‍ 25നാണ് ഡോ.പോളി ടി.ജോസഫിനെ കണ്ടത്. അദ്ദേഹം ശസ്ത്രക്രിയാ തിയതി തീരുമാനിക്കുകയും ചെയ്തു. മെയ് അഞ്ചിനായിരുന്നു ശസ്ത്രക്രിയ. രാവിലെ 11.30 ന് ആരംഭിച്ച ശസ്ത്രക്രിയ വൈകീട്ട് 5.30 നാണ് അവസാനിച്ചത്. മെയ് 12 നു വീണ്ടും ഒരു ശസ്ത്രക്രിയക്കു കൂടി വിധേയനാകാന്‍ ഡോക്ടര്‍ ആവശ്യപ്പെട്ടതായും അതനുസരിച്ച് രണ്ടാമതും ശസ്ത്രക്രിയ ചെയ്തതായും ജോസഫ് പോള്‍ പരാതിയില്‍ പറയുന്നു. മെയ് 30 ന് ആശുപത്രി വിട്ടു. വയറു വേദനയെ തുടര്‍ന്ന് ഒരാഴ്ച കഴിഞ്ഞ് വീണ്ടും ആശുപത്രിയിലെത്തി. ഈ സമയത്ത്  സ്‌കാനിങ് നടത്തിയ ഡോക്ടര്‍ വയറിനുള്ളില്‍ പഴുപ്പുണ്ടെന്നും വീണ്ടും ശസ്ത്രക്രിയ ചെയ്യണമെന്നും ആവശ്യപ്പെട്ടു. ഉടന്‍ അഡ്മിറ്റ് ആകണമെന്ന് ഡോക്ടര്‍ പറഞ്ഞെങ്കിലും സംശയം തോന്നിയതിനെ തുടര്‍ന്ന് ഒരു സ്വകാര്യ ലാബില്‍ പോയി എക്‌സറേയെടുത്തു. അപ്പോഴാണ് വയറിനുള്ളില്‍ കത്രികയുള്ളതായി  അറിയുന്നത്. തുടര്‍ന്ന്  തൃശൂരിലെ സ്വകാര്യ ആശുപത്രിയില്‍ എത്തി സി.ടി സ്‌കാന്‍ ചെയ്തപ്പോഴും കത്രിക വയറിനുള്ളില്‍ കിടക്കുന്നതായി കണ്ടെത്തി. സ്വകാര്യ ആശുപത്രിയില്‍ വെച്ചാണ് ഇതു പുറത്തെടുത്തതെന്നും സിറ്റി പൊലിസ് കമ്മിഷണര്‍ക്ക് നല്‍കിയ പരാതിയില്‍ പറയുന്നു. ഇക്കാര്യം ഡോ.പോളിയെ അറിയിച്ചപ്പോള്‍ ശസ്ത്രക്രിയക്കിടെ ഇങ്ങനെയെല്ലാം സംഭവിക്കുന്നത് സ്വാഭാവികമാണെന്ന തരത്തില്‍ മോശം പ്രതികരണമാണ് ലഭിച്ചതെന്ന് കുടുംബം ആരോപിച്ചു. പരാതി ലഭിച്ചതായും അന്വേഷിക്കുമെന്നും മെഡിക്കല്‍ കോളജ് സൂപ്രണ്ട് പറഞ്ഞു.