നീലേശ്വരം: വൈദ്യുതി മന്ത്രി എം.എം മണി ഇടപെട്ടു; നീലേശ്വരം നഗരത്തിലെ പൊട്ടിവീഴാറായ വൈദ്യുത തൂണ്‍ മാറ്റും. ഇതു സംബന്ധിച്ച് കഴിഞ്ഞ ദിവസം 'സുപ്രഭാതം' വാര്‍ത്ത നല്‍കിയിരുന്നു. ഇതു ശ്രദ്ധയില്‍ പെട്ട മന്ത്രി ഉടന്‍ തന്നെ ഫോണിലൂടെ നീലേശ്വരത്തെ അസിസ്റ്റന്റ് എക്‌സിക്യൂട്ടിവ് എന്‍ജിനിയര്‍ക്ക് തൂണ്‍ മാറ്റാന്‍ നിര്‍ദേശം നല്‍കുകയായിരുന്നു.
ബസ് സ്റ്റാന്‍ഡിനു സമീപം വി.എസ് ഓട്ടോ സ്റ്റാന്‍ഡിനു മുന്‍ വശത്തായാണ് അടിഭാഗം ദ്രവിച്ച വൈദ്യുത തൂണ്‍ സ്ഥിതി ചെയ്യുന്നത്. ചെറിയൊരു മര്‍ദമുണ്ടായാല്‍ പോലും നിലംപൊത്തുന്ന നിലയിലാണു തൂണുള്ളത്. നിരവധി വാഹനങ്ങളും യാത്രക്കാരും കടന്നു പോകുന്ന തിരക്കേറിയ റോഡരികിലായതു കൊണ്ടു തന്നെ അപകട സാധ്യതയും ഏറെയായിരുന്നു.
മന്ത്രിയുടെ നിര്‍ദേശം ലഭിച്ചതായും ഇയാഴ്ച തന്നെ തൂണ്‍ മാറ്റുമെന്നും അസിസ്റ്റന്റ് എക്‌സിക്യുട്ടിവ് എന്‍ജിനിയര്‍ വി.വി ഉമേശന്‍ പറഞ്ഞു.