കൊച്ചി: നിസാമുദ്ദീനില്‍ നിന്ന് എറണാകുളത്ത് എത്തിയ മംഗള എക്‌സ്പ്രസില്‍ നിന്നും ഗ്രനേഡിന്റെ രൂപത്തിലുള്ള സ്‌ഫോടക ശേഖരം കണ്ടെത്തി. ഇന്നലെ ഉച്ചക്ക് എറണാകുളം സൗത്ത് റെയില്‍വേ സ്റ്റേഷനില്‍ യാത്രക്കാരെ ഇറക്കിയ ശേഷം കടവന്ത്ര പൊന്നുരുന്നി യാഡിലേക്ക് മാറ്റിയ ട്രെയിനില്‍ നിന്നാണ് സ്‌ഫോടക ശേഖരം കണ്ടെത്തിയത്. എസ്.വണ്‍ കോച്ചിന്റെ സീറ്റിന് അടിയില്‍ സഞ്ചിയില്‍ സൂക്ഷിച്ചിരിക്കുന്ന നിലയിലായിരുന്നു ഇത്.

ട്രെയിന്‍ വൃത്തിയാക്കാനെത്തിയ ജീവനക്കാരന്‍ സഞ്ചി പരിശോധിക്കുന്നതിനിടെ ചെറിയ പൊട്ടിത്തെറി ഉണ്ടായി. ഇയാളുടെ കാലിന് പരുക്കേറ്റു. തുടര്‍ന്ന് വിവരം റെയില്‍വേ പൊലിസിനെ അറിയിക്കുകയായിരുന്നു. ഗ്രനേഡിന്റെ രൂപത്തിലുള്ള 20 എണ്ണമാണ് കണ്ടെത്തിയത്. റെയില്‍വേ പൊലിസിന്റെ ഉന്നത ഉദ്യോഗസ്ഥര്‍ സ്ഥലത്തെത്തി പരിശോധന നടത്തി. ഇന്ന് രാവിലെ ആര്‍.പി.എഫിന്റെ പ്രത്യേക വിഭാഗം എത്തി ശാസ്ത്രീയ പരിശോധന നടത്തും. കടവന്ത്ര പൊലിസും അന്വേഷണം ആരംഭിച്ചു.